Korzinka супермаркетлари тармоғини бошқарувчи Anglesey Food компанияси Тошкентдаги дўконлари ёнида жойлашган 36 та мавжуд автотураргоҳни ижарага олиш ҳуқуқини қўлга киритди.
E-auksion маълумотларига кўра, компания ягона лот учун 20,95 млрд сўм (тахминан 1,74 млн доллар) таклиф қилди. Бу бошланғич нархдан (1,34 млрд сўм) қарийб 16 баробар юқори.
Савдолар 13 июль куни бўлиб ўтди ва 9 соат 28 дақиқа давом этди. 293 қадам давомида лот нархи 1,3 млрд сўмдан 20,948 млрд сўмгача, яъни 15,65 баробар ошди. Ғолиб компания тўловни амалга оширган, ҳозирда буюртмачи билан шартнома тузилиши кутилмоқда.
| Туман | Манзил | Майдони, гектар |
| Олмазор | Ц даҳаси-17/18, 52А (Korzinka — Себзор) | 0.13 |
| Олмазор | Файзибаланд-2 тор кўчаси, 72А (Korzinka — Олмазор) | 0.04 |
| Олмазор | Қорақамиш-3, 56А (Korzinka mahalla — Ғалаба) | 0.02 |
| Олмазор | Беруний, 48А (Korzinka — Ғунча) | 0.08 |
| Олмазор | Қорақамиш-2, 17А (Korzinka — Қорақамиш2/5) | 0.19 |
| Олмазор | Қорақамиш-1/3, 35Б (Korzinka — Қорақамиш1/3) | 0.23 |
| Миробод | Саид Азимов, 81А (Korzinka — Азимов) | 0.18 |
| Мирзо Улуғбек | Қорасув-2, 23А (Korzinka — Қорасув) | 0.08 |
| Мирзо Улуғбек | Буюк Ипак йўли, 299 (Korzinka — Луначарский) | 0.04 |
| Мирзо Улуғбек | Сайрам, 41 (Korzinka — Бўз бозори) | 0.04 |
| Сергели | Янги Сергели, Иттифок маҳалласи (Korzinka — Сергели) | 0,26 |
| Сергели | Янги Сергели, Янги Сергели маҳалласи (Korzinka — Сергели-8) | 0.07 |
| Учтепа | Заргарлик, 10А (Korzinka — Глобус) | 0.12 |
| Учтепа | Кўкча Дарвоза, 628Е (Korzinka — Бешқайроғоч) | 0.09 |
| Учтепа | Чилонзор-26, 9Б (Korzinka — Заргарлик) | 0.04 |
| Учтепа | Чилонзор-12, 7Е (Korzinka — Воҳа) | 0.18 |
| Учтепа | Чилонзор-26, 11Е (Korzinka — Чилонзор-26) | 0.06 |
| Чилонзор | Ал-Хоразмий массиви, 3Б (Korzinka — Бисёр) | 0.1 |
| Чилонзор | Заргарлик, 31А (Korzinka mahalla — Шарқ тонги) | 0.12 |
| Чилонзор | МКАД, 20А (Korzinka — Кўҳинур) | 0,05 |
| Чилонзор | Бунёдкор шоҳкўчаси, 1Б (Korzinka — Новза) | 0,05 |
| Чилонзор | Чўпонота, 57А (Korzinka — Чилонзор-8) | 0.11 |
| Шайхонтоҳур | Жарариқ, 7А (Korzinka — Жарариқ) | 0,05 |
| Шайхонтоҳур | Бунёдкор шоҳкўчаси, 4Д (Korzinka — Камолон) | 0.07 |
| Шайхонтоҳур | Қоратош, 2Б (Korzinka — Коратош) | 0.19 |
| Шайхонтоҳур | Абай, 13 (Korzinka — Абай) | 0.22 |
| Шайхонтоҳур | Ибн-Сино-1, 8 (Korzinka mahalla — Ибн-Сино) | 0.04 |
| Шайхонтоҳур | МКАД, 63А (Korzinka — Лабзак) | 0.06 |
| Юнусобод | Янгишаҳар, 7А (Korzinka — Самара) | 0.23 |
| Юнусобод | Амир Темур шоҳкўчаси, 112 (Korzinka — Шаҳристон) | 0.14 |
| Юнусобод | Юнусобод-14, 62 (Korzinka — Аҳмад Дониш) | 0.15 |
| Юнусобод | Атхам Раҳмат, 12 (Korzinka — София) | 0,05 |
| Яккасарой | Қушбеги, 28/1 (Korzinka — Бошлик) | 0.19 |
| Яшнобод | Шоҳимардон, 84 (Korzinka — Янгиобод) | 0.12 |
| Яшнобод | Мирзо Улуғбек, 10/1 (Korzinka — Машҳади) | 0.11 |
| Яшнобод | Олтинтепа, 7Б (Korzinka — Риёзий) | 0.09 |
Spot жадвали
Июнь ойида Tashkent Invest муниципал компанияси пойтахтнинг 10 туманида жойлашган, умумий майдони 3,99 гектар бўлган ер участкаларини ягона лот сифатида савдога қўйган эди. Уларда давлат-хусусий шериклик асосида пулли ер усти автотураргоҳлари ташкил этиш режалаштирилган.
Лойиҳа муддати 10 йилни ташкил этади, хусусий инвестицияларнинг энг кам ҳажми эса 10,85 млрд сўм қилиб белгиланган.
Лотга илова қилинган рўйхат ва геолокация маълумотларига кўра, барча 36 та участка Korzinka супермаркетлари ёнида жойлашган.
Тармоқ матбуот хизмати автотураргоҳларни ижарага олиш ҳуқуқини қўлга киритганини тасдиқлаб, лойиҳа харидорлар учун автотураргоҳлардан фойдаланиш имкониятини яхшилашга қаратилганини билдирди.
«Korzinka учун автотураргоҳ харидорларга кўрсатиладиган хизматнинг муҳим қисмидир. Компания меҳмонлар дўконга ташриф буюрганида автомобиль учун бўш жой излашга ортиқча вақт сарфламасдан, харидларини қулай амалга оширишлари учун шароит яратишга интилади», — дейилади компания хабарида.
Korzinka маркетинг департаменти раҳбари Малик Каримовнинг ёзишича, тармоқ харидорлар учун автотураргоҳдан бепул фойдаланиш имкониятини сақлаб қолиш мақсадида савдоларда мустақил қатнашган.
«Биз уларни ўзимиз сотиб олдик, чунки мижозларга харид қилиш учун бир соат бепул вақт беришни ва уларни бошқа бирор киши сотиб олиб, истаган тарифни белгилаши мумкин бўлган вазиятнинг олдини олишни истадик», — деди у.
Бундай тизим тармоқнинг қатор супермаркетлари ёнида аллақачон амал қилмоқда: автотураргоҳнинг биринчи соати бепул тақдим этилади, шундан кейин эса соатбай ҳақ олинади. Korzinka таъкидлашича, кўпчилик харидлар учун бир соат етарли бўлади, вақт бўйича чеклов эса автотураргоҳлардаги жойлар айланмасини ошириш имконини беради.
Лойиҳанинг техник оператори сифатида ҳозирги босқичда Parking24 иштирок этмоқда. Автотураргоҳларни ташкил этиш барча белгиланган тартиб-таомиллар ва келишувлар якунланганидан кейин босқичма-босқич амалга оширилади.
Компания алоҳида таъкидлашича, гап йўл бўйидаги пулли автотураргоҳлар ҳақида кетмаяпти. Korzinka умумий фойдаланишдаги автомобиль йўллари бўйлаб жойлашган жойларни олмайди.
«Гап фақат Korzinka супермаркетлари ёнида мавжуд бўлган автотураргоҳ майдонлари ҳақида бормоқда. Ушбу автотураргоҳлар қатнов қисмидан ташқарида жойлашган бўлиб, йўл ҳаракати, пиёдалар йўлаклари ва яшил ҳудудлардан ажратилган ҳамда аллақачон супермаркет меҳмонлари томонидан фойдаланиб келинмоқда», — дейилади тармоқ баёнотида.
Энг кам тариф — соатига 10 минг сўм
Аукцион шартларига кўра, автотураргоҳлар сунъий интеллект функцияларига эга видеокузатув тизимлари, бўш жойлар ҳақида маълумот кўрсатувчи LED-экранлар, тўлов терминаллари ва шаҳарнинг «Пулли автотураргоҳ» тизими билан интеграция қилинган ахборот тизими билан жиҳозланиши керак.
Тўловлар терминаллар, электрон тўлов тизимлари ва банк карталари орқали қабул қилиниши лозим. Лот ҳужжатларида энг кам ставка соатига 10 минг сўм этиб белгиланган.
Шунингдек, доимий фойдаланувчилар учун бонусларга эга лояллик дастурини жорий этиш ҳам режалаштирилган.
Tashkent Invest давлат шериги сифатида автотураргоҳ учун тўловларнинг камида 10 фоизини олади. Яна 5 фоизни «Пулли автотураргоҳ» тизими операторига ўтказиш режалаштирилган.
Пойтахт ҳокимлиги маълум қилишича, аукцион якунлари бўйича бир марталик тўловдан ташқари, инвестор ҳар йили ижара ҳақини тўлайди ҳамда Тошкент шаҳрини ривожлантириш жамғармасига ажратмалар қилади.
Автотураргоҳлар лойиҳалари ва схемалари Тошкентда йўл ҳаракатини ташкил этиш маркази билан келишилиши лозим. Участкаларда фақат енгил конструкциялар ўрнатишга рухсат берилади, капитал объектлар қурилишига йўл қўйилмайди.
Ҳокимлик таъкидлашича, қатнов қисми ташқарисида ер усти автотураргоҳларини ривожлантириш тротуарлар, пиёдалар ўтиш жойлари ва кўчаларни тартибсиз қўйилган автомобиллардан холи қилиш сиёсати доирасида амалга оширилмоқда.
«Шундай қилиб, гап шунчаки автомобиллар учун тураргоҳлар яратиш ҳақида кетмаяпти. Бу — пиёдалар учун шаҳар сиёсатининг амалий ижроси бўлиб, бунда автомобиллар тартибли жойларни эгаллайди, кўчалар ва тротуарлар эса одамларга қайтарилади», — дейилади пойтахт маъмурияти хабарида.