Ўзбекистон Рақобатни ривожлантириш ва истеъмолчилар ҳуқуқларини ҳимоя қилиш қўмитаси Фарҳод Маматжоновнинг Perfectum мобил алоқа оператори савдо белгиси остида фаолият юритувчи Rubicon Wireless Communication компаниясининг 50 фоиз улушини олиш бўйича битимни маъқуллади.
Қўмита матбуот хизматининг хабар беришича, идора тадбиркорнинг иқтисодий концентрация битимига розилик бериш юзасидан аризасини кўриб чиққан.
Қўмита махсус комиссияси томонидан ўтказилган таҳлил натижаларига кўра, мазкур битимнинг товар бозорида рақобат муҳитига салбий таъсир кўрсатмаслиги тўғрисида хулоса қилинган ва аризани қаноатлантириш ҳамда битимга розилик бериш ҳақида қарор қабул қилинган.
2024 йил август ойида Фарҳод Маматжонов ўзини UzTex Group таъсисчиси, InfinBank’нинг асосий акциядори ва бошқа тадбиркорлик субъектлари эгаси сифатида таништириб, президент Шавкат Мирзиёевга Британиянинг Vodafone компанияси билан ҳамкорликда Ўзбекистонда 5G Standalone мобил алоқа тармоғини ишга тушириш режалари ҳақида маълум қилган эди.
Биз Perfectum компаниясини хусусийлаштирдик… Биз дунёдаги йирик компаниялардан бири — Британиянинг Vodafone компанияси билан биргаликда Ўзбекистонда 5G Standalone мобил алоқасини ишга тушириш ишларини бошладик», — деган эди у.
Тадбиркорнинг сўзларига кўра, лойиҳага 250 млн евро инвестиция киритиш режалаштирилган эди. Шундан 100 млн еврони Финляндиянинг экспорт агентлигидан «Ўзсаноатқурилишбанк» орқали жалб қилиш, яна 150 млн еврони таъсисчилар маблағлари ҳисобидан киритиш кўзда тутилган. Ускуна ва технологияларни Финляндиянинг Nokia компанияси, техник ҳамкор сифатида эса БААнинг e& технологик гуруҳи иштирок этиши режалаштирилган эди.
Лойиҳани 2025 йилнинг биринчи чорагида ишга тушириш ва 1000 та иш ўрни яратиш режалаштирилган эди. Маматжонов лойиҳанинг мақсади миллий мобил алоқа операторини яратишдан иборат эканини таъкидлаганди.
2024 йил июнь ойида Perfectum 5G Standalone New Radio технологияси асосида янги инфратузилма яратиш бўйича e& Group билан ҳамкорлик шартномасини имзолаганди. Ундан аввал, 2023 йил октябрь ойида оператор Nokia иштирокида 5G New Radio технологиясини жорий этиш режалари ҳақида хабар берган эди.
2024 йил март ойида аввал 65 фоиз улуши давлатга тегишли бўлган Perfectum тўлиқ янги мулкдорга ўтгани маълум бўлган. Операторнинг юридик шахси — Rubicon Wireless Communication МЧЖнинг 100 фоиз улуши тадбиркор Абдумалик Иминовга тегишли бўлган. Компания раҳбари сифатида Дмитрий Шуков кўрсатилган.
Амалдаги маълумотларга кўра, ҳозир Иминов компаниянинг 50 фоиз улушига эгалик қилади, хорижий IMC-Capital корхонаси (у эса ўз навбатида БААда рўйхатдан ўтган Berill Holding Company Limited компанияси томонидан тўлиқ назорат қилинади) — 37,5 фоиз, Камрон Акбаров эса 12,5 фоиз улушга эга.
Perfectum’даги улушдан ташқари, IMC-Capital UCMG компаниясининг 75 фоизига ҳам эгалик қилган. Ушбу компания 2024 йил июль ойида Ягона умумреспублика процессинг маркази (Uzcard оператори), ATTO ва Plum Technologies учун ишончли бошқарувчи ҳуқуқини олган.
Perfectum’даги давлат улушини хусусийлаштириш режалари ҳақида илк бор 2020 йилда маълум қилинган эди. Ўшанда операторнинг 65 фоизи давлатга, қолган 35 фоизи эса Amis Protrade International компаниясига тегишли бўлган. Улушларнинг сотилиши ҳақидаги маълумотлар очиқ манбаларда эълон қилинмаган.