16 июль куни ерусти ҳалқа йўналишининг «Турон» метробекатида «том конструкциясининг қисмида силжиб тушиш» ҳолати аниқланди, деб хабар бермоқда «Тошкент метрополитени». Ҳодиса оқибатида 2 йўловчи енгил жароҳат олган.
Қайд этилишича, ҳаракат хавфсизлигини таъминлаш мақсадида мазкур бекатда поездлар ҳаракати зудлик билан вақтинча тўхтатилган. Ҳозирда мутахассислар томонидан ҳолат юзасидан техник ўрганиш ишлари олиб борилмоқда ҳамда аниқланган камчиликларни бартараф этиш чоралари кўрилмоқда, дейилади хабарда.
Жароҳатланган фуқароларга воқеа жойининг ўзида биринчи тиббий ёрдам кўрсатилгани билдирилди.
Йўловчиларга қулайлик яратиш мақсадида «Қипчоқ» ва «Қурувчилар» метро бекатлари оралиғида бепул метробуслар ҳаракати йўлга қўйилган, деб қўшимча қилди ташкилот.
Корхона ноқулайликлар учун йўловчилардан узр сўраб, йўловчилар хавфсизлигини таъминлашни энг устувор йўналиши эканини маълум қилди.
Ҳалқа йўли қурилиши 2017 йилда бошланганди. Йўналишнинг сўнгги икки бекати — «Қипчоқ» ва «Турон» 2024 йилнинг март ойида очилган.
2025 йилнинг июнь ойида эса ерусти метросининг «Қипчоқ» ва «Турон» бекатлари оралиғида режали профилактика ишларини олиб бориш учун йўллар янгиланганди.
