16 июль куни кечқурун Тошкентнинг Дўрмон йўли ва Ғазалкент кўчалари чорраҳасида учта хизмат мотоцикли иштирокида йўл-транспорт ҳодисаси юз берди. Тўқнашув лаҳзалари автомобиллардан бирининг видеорегистраторига муҳрланган. Воқеа оқибатлари акс этган видеолар ҳам ижтимоий тармоқ фойдаланувчилари томонидан тарқатилди.
Видеоёзувдан кўринишича, чорраҳада автомобиллар ва пиёдалар ҳаракатини бир нечта ҳуқуқ-тартибот идоралари ходимлари тартибга солиб турган. Юқори тезликда фургон ва яна бир автомобиль ўтиб кетганидан сўнг улар тарқала бошлайди ва ҳаракатланишга рухсат беради. Светофорда яшил чироқ ёниши билан енгил автомобиллардан бири ҳаракатни бошлайди.
Фото: t.me/Tashkent_Land.
У чорраҳага чиқиши билан, катта тезликда ёнма-ён келаётган иккита мотоцикл, уларнинг ортидан эса яна бири келиб урилади. Видеодан кўринишича, охирги мотоцикл тўқнашувдан сўнг дарҳол ёниб кетган. Зарб оқибатида жиддий шикастланган автомобиль йўлнинг қарама-қарши томонига учиб ўтиб, бошқа иккита машинага шикаст етказган. Ҳалокат юз берган ҳудудда ҳаракат вақтинча тўхтатилган ва оқибатлар бартараф этилгач, йўл қайта очилган.
Ҳуқуқ-тартибот идораларидаги манбанинг Gazeta`га маълум қилишича, хизмат мотоцикллари ЙПХга тегишли бўлган.
ИИВ ЖХД ЙҲХХ матбуот котиби Зойир Йўлдошевнинг маълум қилишича, ЙТҲ оқибатида патруль мотоциклини бошқариб борган бир нафар ЙПХ ходими воқеа жойида ҳалок бўлган. «Тан жароҳати олганларга тиббий ёрдам кўрсатилмоқда», — деди у жароҳатланганларнинг аниқ сонини очиқламасдан.
Ҳолат юзасидан терговга қадар текширув ҳаракатлари олиб борилмоқда. Зойир Йўлдошев, шунингдек, авария кортеж кузатуви вақтида содир бўлмаганини қўшимча қилди. У ижтимоий тармоқларда муҳокама қилинаётган бу талқинни ҳақиқатга тўғри келмайди, деб атади.
