АҚШ Қуролли кучлари Марказий қўмондонлиги (CENTCOM) 17 июлга ўтар кечаси Эронга навбатдаги авиазарбалар сериясини йўллаганини маълум қилди.
Зарбалар Эроннинг ўнлаб ҳарбий нишонларига, «жумладан, соҳилбўйи кузатув ва ҳаво ҳужумидан мудофаа объектлари, ҳарбий-логистика инфратузилмаси ҳамда денгиз объектларига» берилган. «Бу АҚШнинг Эронга кетма-кет зарба бераётган олтинчи кечасидир», — дейилади хабарда.
Associated Press`нинг Эрон давлат ОАВларига таяниб ёзишича, Эрон жанубидаги Ҳурмузгон ҳудудида автомобиль ва темирйўл кўприклари ўққа тутилган. Оқибатда, Эрон расмийларининг маълумотларига кўра, камида етти киши ҳалок бўлган. Агентликнинг қайд этишича, ҳужумдан кўзланган мақсад, катта эҳтимол билан, Бандар-Аббос портини Эроннинг марказий ҳудудларига, жумладан, Теҳронга олиб борувчи йўллардан узиб қўйиш бўлган.
Зарбалар, шунингдек, Эроннинг Ўмон кўрфазидаги Чобаҳор портида жойлашган кузатув минорасини ҳам вайрон қилган. Ундан тижорат кемалари ҳаракатини назорат қилиш учун фойдаланиб келинган.
Эрон бунга жавобан Иордания, Қатар, Кувайт ва Баҳрайндаги АҚШ ҳарбий объектларига ракета зарбалари йўллади, деб ёзди CNN.
14 июль куни АҚШ Эрон портларининг денгиз блокадасини қайта тиклади. АҚШ президенти Дональд Трамп, агар Теҳрон Вашингтон билан келишув бўйича музокараларни қайта бошламаса, Эрон электр станциялари ва кўприкларига зарба бериш билан яна таҳдид қилганди.
Июнь ойида АҚШ ва Эрон урушни тугатиш ва Ҳурмуз бўғзини блокададан чиқаришни назарда тутувчи ўзаро англашув меморандумини имзолаганди. Томонлар чекланган тарзда зарбалар алмашишда давом этди, бироқ июль ойи бошида фаол равишда ўзаро ҳужумларни қайта бошлади. Ўшанда Дональд Трамп Эрон билан ўт очишни тўхтатиш режими «якунланганини» маълум қилганди.