Эрон АҚШ билан можарони тўхтатиш бўйича имзоланган меморандум доирасидаги ўз мажбуриятларини бажаришни вақтинча тўхтатганини маълум қилди.
Эрон ташқи ишлар вазири ўринбосари Казем Ғарибободийнинг билдиришича, Теҳрон ҳозирда мамлакат мудофааси масалаларига эътибор қаратаётгани сабабли меморандум бўйича мажбуриятларни бажармаяпти.
«Биз ҳам ўз мажбуриятларимизни бажаришни тўхтатдик. Айни пайтда асосий эътиборимиз мамлакат мудофаасини таъминлашга қаратилган», – деди у.
Аввалроқ, 15 июль куни Эрон парламенти спикери ва АҚШ билан музокаралар бўйича Эрон делегацияси раҳбари Муҳаммад Боқир Қолибоф ҳам Вашингтон меморандум шартларига амал қилмаётган бир пайтда Теҳроннинг ҳам унга риоя қилиши маъносиз эканини таъкидлаган эди.
Можарони якунлашни назарда тутувчи меморандум Теҳрон ва Вашингтон ўртасида 18 июнь куни имзоланган эди. Бироқ 8 июлдан бошлаб АҚШ ҳарбийлари Эрон ҳудудига бир неча марта зарба берди. АҚШ Марказий қўмондонлиги бу ҳаракатларни Ҳўрмуз бўғози орқали ҳаракатланаётган тижорат кемаларига нисбатан Эрон томонидан содир этилган ҳаракатларга жавоб сифатида изоҳлаган.
Бунга жавобан Эрон қуролли кучлари Яқин Шарқдаги АҚШ ҳарбий базаларига зарбалар берган. Шунингдек, Теҳрон Вашингтонни ўт очишни тўхтатиш тўғрисидаги меморандумни бузганликда айблаган. АҚШ президенти Дональд Трамп эса 9 июль куни ўт очишни тўхтатиш режими амалда эмаслигини билдирган.