Давлат меҳнат инспекцияси 19 июль куни аномал иссиқ шароитида ободонлаштириш хизмати ходимларининг ҳаёти ва соғлиғини ҳимоя қилишга қаратилган кўрсатмани барча ҳокимликларга юборганини маълум қилди. Идора, шунингдек, барча давлат органлари ва мулкчилик шаклидан қатъи назар ташкилотлар учун иссиқ об-ҳавода йиғилишлар ҳамда жамоат ишларини ўтказишга йўл қўйилмаслиги тўғрисидаги талабларни эълон қилди.
Бу чора тармоқларда 17 июль куни жазирама авжига чиққан вақтда ободонлаштириш ходимлари кўча тозалаётгани акс этган видео пайдо бўлганидан кейин кўрилди. Бундан ташқари, Тошкентнинг турли туманлари аҳолиси шу дам олиш кунлари маҳалла вакиллари уларни ҳашарга чақираётгани ҳақида хабар бермоқда (хабарлардан бирида бу «маҳалла шарафини ҳимоя қилиш учун» экани айтилган).
15 июль куни инспекция барча иш берувчиларга очиқ ҳавода ишлайдиган ходимларнинг меҳнат шароитларини қайта кўриб чиқиш ҳамда энг иссиқ соатларда бундай ишларни қисқартириш ёки тўхтатиб туриш зарурлиги бўйича тавсияларни эълон қилганди.
«Аномал иссиқ об-ҳаво даврида очиқ майдонларда оммавий йиғилишлар ва жамоавий ишларни ташкил этиш тақиқланади. Республика кузатилаётган аномал иссиқ шароитида очиқ ҳавода узоқ вақт ишлаш иссиқ уриши, сувсизланиш, юрак-қон томир ва асаб тизимлари фаолиятининг бузилишига ҳамда бошқа жиддий оқибатларга олиб келиши мумкин», — дейилади хабарда.
Ободонлаштириш ходимларига оид кўрсатмада уларнинг соғлиғи учун хавф туғдириши мумкин бўлган ишларни соат 10:00 дан 17:00 гача бўлган вақт оралиғида вақтинчалик тўхтатиш ва мослашувчан иш режимини жорий этиш зарурлиги белгиланган. Бундан ташқари, ходимлар етарли миқдорда ичимлик суви ҳамда шахсий ҳимоя воситалари билан таъминланиши, улар учун қуёш ва юқори ҳароратдан ҳимояланган дам олиш жойлари яратилиши шарт. Юқори ҳарорат туфайли соғлиғи ёмонлашган ходимларга зудлик билан тиббий ёрдам кўрсатилиши лозим.
Давлат органининг эслатиб ўтишича, белгиланган қоидаларга кўра, ҳаво ҳарорати +36 даража ва ундан юқори бўлганда очиқ майдонларда ишлаш ўта хавфли (экстремал) меҳнат шароити ҳисобланади.
Ишларни куннинг салқин вақтида — эрталаб соат 10:00 гача ёки кечқурун соат 17:00 дан кейин амалга ошириш лозим. Агар ишларни кечиктириб бўлмаса, махсус меҳнат ва дам олиш режими жорий этилиши, иш вақти қисқартирилиши, ходимлар эса соя-салқин дам олиш жойлари, ичимлик суви, шахсий ҳимоя воситалари ҳамда биринчи тиббий ёрдам қутичалари билан таъминланиши шарт.
Бундан ташқари, юқори ҳарорат шароитида ишлаётган ходимлар соғлиғининг ҳолати доимий равишда мониторинг қилиб борилиши керак. Саломатлиги ёмонлашган тақдирда, улар зудлик билан ишдан озод этилиши ва тиббий ёрдам олиши лозим.
Меҳнатни муҳофаза қилиш талабларини бузган шахслар қонунчиликда белгиланган тартибда жавобгарликка тортилади, деб баёнот берди инспекция.