Футбол бўйича 2026 йилги Жаҳон чемпионатининг Испания ва Аргентина терма жамоалари ўртасидаги финал учрашувида 1:0 ҳисобида Испания миллий терма жамоаси ғалаба қозонди. Учрашув АҚШдаги «Метлайф» стадионида бўлиб ўтди. Словениялик Славко Винчич бош ҳакам сифатида иш олиб борди.
90+3-дақиқада аргентиналиклар таркибида Энцо Фернандес иккинчи сариқ карточка туфайли майдондан четлатилди. Қўшимча вақтнинг 106-дақиқасида Ферран Торрес урган гол ўйин тақдирини ҳал қилди.
Шу тариқа, Испания икки карра жаҳон чемпионига айланди, бундан аввал испанлар ЖЧда 2010 йилда ғолиб чиққанди.
https://twitter.com/SEFutbol/status/2078986268873040167?s=20
Испания терма жамоаси бутун ўйин давомида устунликка эга бўлди. Уч карра жаҳон чемпиони Аргентина эса қаторасига иккинчи бор чемпионатда ғолиб чиқиши мумкин эди, аммо бундай бўлмади.
Умумий статистика
- Тўп назорати: Испания — 65% | Аргентина — 35%
- Эҳтимолий голлар (xG): Испания — 2.29 | Аргентина — 0.22
- Хавфли вазиятлар: Испания — 4 | Аргентина — 0
- Умумий зарбалар: Испания — 20 | Аргентина — 2
- Нишонга аниқ борган зарбалар: Испания — 12 | Аргентина — 0
Испания терма жамоаси марказий ярим ҳимоячиси ва сардори Родри (Родриго Эрнандес) турнирнинг энг яхши ўйинчиси деб топилди.
Испания финалга қадар қаторасига 37 та ўйинда мағлубиятга учрамаганди. Эркаклар футболи тарихида бундай натижага фақатгина бошқа иккита терма жамоа эришган — Италия ва Аргентина.
Финалга қадар бўлган йўлда испанлар бирорта ўйинда мағлубиятга учрамади ва ўз дарвозаларидан фақатгина битта гол ўтказиб юборди, ярим финалда эса Францияни деярли бутун ўйин давомида тўп ортидан югуришга мажбур қилиб, доғда қолдирганди.
Аргентина бўлса голларни асосан мағлуб бўлаётиб, учрашувларнинг сўнгги дақиқаларида киритди, аммо шунга қарамай, финалгача чемпионатда ҳаммадан кўп — 19 та гол уришга муваффақ бўлди.
Эслатиб ўтамиз, учинчи ўрин учун ўтказилган баҳсда Англия Францияни 6:4 ҳисобида мағлуб этди. Чемпионатда 10 та гол урган Килиан Мбаппе турнир тўпурарига айланди. Шу тариқа, Мбаппе иккита Жаҳон чемпионатида «Олтин бутса»ни қўлга киритган илк футболчи бўлди.