Фарғона шаҳрида чақалоғини сотишга уринганликда айбланган эр-хотинга нисбатан 5 йилдан озодликдан маҳрум қилиш жазоси тайинланди. Бу ҳақда Zo‘r TV телеканалининг «Бу кун» дастурида хабар берилди.
Суд материалларига кўра, эр-хотин Қўқон шаҳрида туғилган бўлиб, шаръий никоҳ асосида бирга яшаб келган. Улар 2025 йил октябрида ўғил фарзандли бўлган.
Репортажда келтирилишича, воқеадан бир муддат аввал эр Фарғона шаҳрига ишлаш учун келган. Кейинчалик рафиқаси ва чақалоғини ҳам ўзи билан олиб келган.
Судда сўроқ қилинган аёлнинг айтишича, у моддий қийинчиликлар ва оилавий келишмовчиликлар сабаб фарзандини бошқа шахсга беришга рози бўлган. «Ўша вақтда дадам билан тортишиб қолган вақтим бўлган. „Уйингдан боланг билан чиқиб кет“ деган, қаттиқ жанжал бўлган. Ўшанда мен ўғлим билан чиқиб кетганман», — деди судланувчи аёл.
Унинг сўзларига кўра, аввал таклифни рад этган, кейин эса «бола яхши шароитда яшайди» деган важ билан розилик билдирган.
Аёл олинадиган пулни қарзларини ёпиш ва Туркияга ишлаш учун кетиш мақсадида сарфламоқчи бўлган. «Қарзларимни тўламоқчи эдим. Мен Туркияга бориб, аям билан ишлаб, ўзимга битта уй қурмоқчи эдим. Бизнесларим бор эди-да. Ана шунга ишлатмоқчи эдим», — деди у.
У судда турмуш ўртоғи билан бу масала муҳокама қилинганини ҳам айтган. «Майли, сенга керак бўлса. Кейин орани узамиз, ажрашамиз деган», — деди аёл.
Жиноят ишлари бўйича Фарғона шаҳар суди ишни кўриб чиқиб, ҳар икки судланувчини Жиноят кодексининг 135-моддаси (Одам савдоси) тегишли қисми билан айбдор деб топди ва уларнинг ҳар бирига 5 йилдан озодликдан маҳрум қилиш жазосини тайинлади.
Суд шунингдек, чақалоқ тақдири юзасидан тегишли қарор қабул қилиб, унинг ҳимояси Қўқон шаҳар Инсон ижтимоий ҳимоя агентлиги ҳамда шаҳар ҳокимлигининг болаларни ҳимоя қилиш бўлими зиммасига юклатилишини белгилади.
Репортажда чақалоқнинг аниқ ёши ва уни бериш эвазига олиниши режалаштирилган маблағ миқдорига аниқлик киритилмаган.
Аввалроқ Бухорода 18 ёшли қиз ўзининг уч кунлик чақалоғини 4000 долларга сотмоқчи бўлганида ушланганди.
ИИВ маълумотларига кўра, 2025 йилда Ўзбекистонда одам савдоси билан боғлиқ 177 та ҳолат кузатилган. Бугунги кунда одам савдосининг асосан, учта: шаҳвоний эксплуатация, меҳнат эксплуатацияси ва чақалоқ савдоси турлари долзарб ҳисобланади. 2026 йилнинг январь-март ойларида одам савдоси билан боғлиқ 57 та ҳолат аниқланган.
Эслатиб ўтамиз, ўтган йили Ўзбекистонда одам савдоси учун жазо чоралари кучайтирилган эди. Хусусан, одам савдоси жиноятини қалбаки ҳужжатлардан фойдаланган ҳолда содир этиш 5 йилдан 10 йилгача (аввал 5 йилдан 8 йилгача эди) озодликдан маҳрум қилиш билан жазоланади. Жиноят жабрланувчининг ўлимига сабаб бўлса, айбланувчини 10 йилдан 15 йилгача озодликдан маҳрум қилиш белгиланганди.