Ижтимоий тармоқ блогерлари Эндрю ва Тристан Тейтлар Буюк Британия расмийлари ака-укаларга нисбатан 38 та янги айблов, жумладан, зўрлаш, баданга шикаст етказиш ва одам савдоси каби жиноятларни илгари сурганидан кейин Қўшма Штатларда ҳибсга олинди. Бу ҳақда Reuters ёзмоқда.
Британия ака-укаларни ҳам янги, ҳам аввалдан мавжуд бўлган айбловлар бўйича жавобгарликка тортиш учун уларни экстрадициялашни талаб қилмоқда.
Британия Қироллик прокуратура хизмати (Crown Prosecution Service, CPS) яна тўрт нафар қўшимча жабрланувчи аниқланганидан кейин 39 ёшли Эндрю ва 38 ёшли Тристан Тейтларга нисбатан кейинги айбловларни илгари сураётганини маълум қилди.
Тейтлар Британияда 2010 йилнинг июли ва 2017 йилнинг августи оралиғида содир этилганликда гумон қилинаётган жиноятлар билан боғлиқ айбловларга дуч келмоқда. Унда айтилишича, Эндрю Тейт яна еттита зўрлаш ҳолати, шунингдек, жинсий эксплуатация ва болаларнинг беҳаё суратларига оид айбловлар билан айбланмоқда, Тристан Тейтга қўйилган айбловлар эса иккита зўрлаш ҳолати ҳамда жинсий эксплуатация мақсадида одам савдосини ташкил этиш ёки унга кўмаклашишнинг учта ҳолатини ўз ичига олади.
«Биз Эндрю ва Тристан Тейтларни қўшимча жиноятлар, жумладан, зўрлаш, жинсий эксплуатация мақсадида одам савдосини ташкил этиш ёки унга кўмаклашиш ҳамда болаларнинг беҳаё суратларига оид жиноятлар учун жиноий жавобгарликка тортишга қарор қилдик», — деди CPS махсус жиноятлар бўлими раҳбари Малкольм Макхаффи ўз баёнотида.
АҚШ ва Британия икки фуқаролигига эга бўлган ака-ука Тейтлар ҳар қандай қонунбузарликни рад этди.
Британиянинг Бедфордшир, Кембрижшир ва Ҳертфордшир графликлари бўйича оғир жиноятларни тергов қилиш бирлашган бўлими раҳбари, бош констебль ёрдамчиси Карена Томас уларга қўйилган айбловларнинг умумий сони 59 тага етганини маълум қилди.
«Мен ҳозир АҚШ ҳуқуқ-тартибот идоралари ходимлари ўтган кеча ушбу иш доирасида Эндрю ва Тристан Тейтларни ҳибсга олганликларини тасдиқлай оламан», — деди у журналистларга. «Шуни аниқ айтмоқчиманки, бизнинг жамиятимизда хотин-қизларга нисбатан эркаклар томонидан қилинадиган зўравонликка ўрин йўқ ва биз жабрланувчиларга кўмак бериш ҳамда бизга келиб тушган барча мурожаатларни тергов қилиш учун тинимсиз меҳнат қилишда давом этамиз».
Бир қатор ОАВнинг хабар беришича, ака-укалар Майамида қўлга олинган.
Ушбу ҳибсга олишлар ака-ука Тейтларнинг тобора кенгайиб бораётган ҳуқуқий муаммоларида янги босқич бўлди. Улар, шунингдек, 2022 йилнинг декабридан бери маҳаллий расмийлар тергов олиб бораётган Руминияда ҳам жиноий жавобгарликка тортилмоқда.
Ака-укалар эркаклик ва бойлик ҳақидаги ўз қарашларини тарғиб қилиш орқали ижтимоий тармоқларда катта аудитория тўплаган, Эндрю Тейт эса илгари ўзини мизогинист, яъни аёлларни ёмон кўрувчи деб таърифлаган.
Эндрю Тейт жорий йилда Британияда тўрт нафар аёл томонидан жисмоний ва жинсий зўравонлик иддаолари бўйича қўзғатилган фуқаролик иши доирасида суд олдида жавоб бериши керак.
Шахси сир сақланишига рухсат берилган тўрт нафар даъвогар аёл Тейт уларни 2013 ва 2015 йиллар оралиғида жисмоний ёки жинсий зўравонликка дучор қилганини даъво қилмоқда. Улардан икки нафари Тейт билан яқин муносабатда бўлганини, қолган икки нафари эса унинг онлайн веб камера бизнесида ишлаганини айтмоқда.
Эндрю Тейт бу айбловларни рад этади. Унинг ҳимоячилари ўз ёзма раддиясида даъволар сохта эканини ва барча жинсий алоқалар ўзаро розилик асосида бўлганини маълум қилган.
- Одам савдоси, жинсий эксплуатация ва зўравонликда айбланаётган Эндрью Тейт, шунингдек, унинг укаси Тристан Тейтнинг 2026 йил апрелида Ўзбекистонда тантанали кутиб олиниши жамоатчилик танқидига сабаб бўлганди. Gazeta ўшанда Эндрю Тейт шахси ҳамда ака-укаларга эълон қилинган айбловлар бўйича обзор тайёрлаган.