Испания финалда Аргентинани 1:0 ҳисобида мағлуб этиб, Жаҳон чемпионлигини қўлга киритди ва «альбиселесте» сардори Лионель Мессини кетма-кет иккинчи бор мундиал ғолиблигига эришиш имконидан маҳрум этди. Замонамизнинг энг буюк футболчиларидан бири бўлган Месси 19 июл куни Нью Жерси штатидаги MetLife стадионида катта эҳтимол Жаҳон чемпионатларидаги ўзининг сўнгги ўйинини ўтказди.
Ҳозир сизга бир неча дақиқага Gazeta фотомухбири Евгений Сорочин иштирок этган Аргентина ва Кабо-Верде ўртасидаги 1/16 финал ўйинига қайтишни таклиф этамиз. Унинг суратларида ўйиннинг муҳим лаҳзалари, ўша машҳур 10-рақамдаги футболкада тўп тепган Месси ва узоқ вақтдан бери футболдаги алоҳида бир даврни рамзий маънода ифодалаб келаётган аргентиналик мухлисларнинг ҳис-туйғулари акс этади.
Материал Uzbekistan Airways кўмагида тайёрланган.
Аргентина мухлислари учун ўзлари майдонга кийиб борадиган футбол формасини танлаш форма дизайни маъносида жуда ҳам қийин, қайси рақамли либосни танлаш маъносида эса жуда ҳам осон — бу жамоа ўйинларида 10-рақамдан бошқа формадаги мухлисни деярли топа олмайсиз.
Масалан, мана бу фотосуратдан афсонавий «ўнлик»га «ҳиёнат қилган» ҳеч бўлмаса учта мухлисни топишга уриниб кўринг.
Кўплаб мухлислар Мессини Диего Марадона билан солиштиришда давом этаётган бир пайтда, аргентиналиклар икки тўп сеҳргарини ҳам дунёга уларнинг мамлакати берганидан фахрланади.
Аргентина трибуналаридаги «мессимания»нинг кўламини сезмасликнинг иложи йўқ.
Аргентина терма жамоаси майдонга тушганида, мухлисларнинг нигоҳи Лионел Мессига қадалади ва камералар унинг ҳар бир ҳаракатини кузатиб боради.
Мессини диққат билан кузатиб бораётганлар орасида Девид Бекхем ва унинг оиласи ҳам бор. Англия терма жамоасининг собиқ сардори аргентиналик футболчи ҳозирда ўйнаётган «Интер Маями» клубининг эгаларидан бири саналади.
Лео бошчилигидаги «Альбиселесте» ҳар бир ўйинда майдонга шундай ўзгача чиқиб келдики, ҳамма унинг жамоасидаги ўзига хос аура ҳақида гапира бошлади. «Агар буни кўраётган бўлсангиз, мағлубиятга тайёрланаверинг», — деб ёзишди одамлар ижтимоий тармоқларда.
Месси рақиблари томонидан ҳам ҳурмат қилинади ва ҳатто уларни ҳайратга солади. Кабо-Верде терма жамоаси сардори Райан Мендеш ўйиндан олдинги танга ташлаш жараёнида ғолиб бўлганига қарамай, аргентиналик футболчига майдоннинг қайси томонида ўйнашни биринчи бўлиб танлаш имкониятини берди.
Рақиблар учрашув давомида ҳам Леога иложи борича яқинроқ бўлишга ҳаракат қилишади, аммо бу улар афсонага яқинроқ юришни истаганидан эмас, балки Аргентина сардорига бўш ҳудуд қолдирмаслик учун қилинади.
Шубҳасиз, жамоаси ишлаган барча жарима зарбалари ва бурчак тўплари Леога ишониб топширилади, у бутун фаолияти давомида бундай стандарт вазиятлардаги маҳоратини қайта-қайта исботлаб келган.
Маямидаги ўйиндан сўнг, фотомухбиримиз Мессининг ўйини унда чуқур таассурот қолдирмаганини тан олди: аргентиналик кўп вақтини шунчаки майдонда юриб ўтказди, вақти-вақти билан эпизодларга арашиб турди. Айни шунинг учун уни «турнирнинг асосий пиёдаси» деб аташди — ҳисоб-китобларга кўра, футболчи ўйинлар вақтининг 63 фоизини пиёда ўтказмоқда.
Лекин у бўш ҳудудни кўриши ёки узатма бериш имкониятини пайқаши биланоқ дарҳол тўғри қарор қабул қилади ва ўзининг ўйинга ҳар бир қўшилишидан максимал самара чиқариб олади.
Ҳаттоки, мана шу «пиёда» темпида ҳам Аргентина етакчиси мазкур Жаҳон чемпионатида саккизта гол урди ва тўртта голли узатмани амалга оширди ва турнир тарихидаги энг яхши ассистентга айланди. Месси ўзининг Жаҳон чемпионатидаги 21-голи билан Германия ҳужумчиси Мирослав Клозенинг рекордини ортда қолдирди, Клозе 16 та гол билан узоқ вақтдан бери Жаҳон чемпионатлари тарихидаги энг кўп гол урган футболчи бўлиб турганди. Бироқ, турнир якунига келиб, француз ҳужумчиси Килиан Мбаппе ўзи иштирок этган учта Жаҳон чемпионатида 22-голини уриб, пешқадамликни илиб кетди.
Аммо Жаҳон чемпионатидаги сўнгги ўйини бўлиши мумкин бўлган учрашувда Лео Аргентинага чемпионлик унвонини сақлаб қолишга ёрдам бера олмади ва майдонни мағлубият билан тарк этди.
Шунга қарамай, аргентиналиклар ўз қаҳрамонларини қўллаб-қувватлашдан бир дақиқага бўлсин тўхташмади. Нью-Йоркдаги финалда Испания терма жамоаси сардори Родрига Жаҳон чемпионатининг энг яхши ўйинчиси мукофоти топширилганида аргентиналик мухлислар бир овоздан фақат битта исмни баланд овозда такрорлашди: Месси!
Материал Uzbekistan Airways кўмагида тайёрланган.