Хорижий туроператорларга Ўзбекистон фуқароларига хорижий турпакетларни фақат маҳаллий лицензияланган туроператор ёки мамлакатда рўйхатдан ўтган ва лицензия олган ўзининг юридик шахси орқали сотишга рухсат бериш таклиф этилмоқда. Бу ҳақда Туризм қўмитаси томонидан жамоатчилик муҳокамаси учун эълон қилинган ҳукумат қарори лойиҳасида айтилади.
Ҳужжатга кўра, хорижий сайёҳлик компанияси Ўзбекистон бозорида икки вариантдан бири: чиқиш туризми билан шуғулланиш ҳуқуқига эга маҳаллий туроператор билан шартнома тузиш ёки Ўзбекистонда ўз юридик шахсини очиш ва туроператорлик фаолияти учун лицензия олиш бўйича ишлаши мумкин бўлади.
Бунда турагентларга маҳаллий лицензияланган туроператор иштирокисиз хорижий операторларнинг турпакетларини бевосита сотиш тақиқланиши таклиф қилинмоқда.
Чеклов, шунингдек, сайтлар, ижтимоий тармоқлар, мобиль иловалар, онлайн тўлов тизимлари ва бошқа каналлар орқали амалга ошириладиган сотувларга ҳам татбиқ этилади.
Агар турагент ушбу талабни бузса, у томонидан сотилган турпакет Миллий туристик платформада рўйхатдан ўтмаган деб ҳисобланади. Компанияга нисбатан қонунчиликда назарда тутилган таъсир чоралари қўлланилиши мумкин.
Шартнома бўйича мажбуриятларнинг бажарилиши юзасидан турист олдидаги жавобгарликни маҳаллий лицензияланган туроператор ёки хорижий компаниянинг Ўзбекистонда рўйхатдан ўтган юридик шахси ўз зиммасига олади.
Лойиҳада маҳаллий оператор турпакетни Миллий туристик платформада рўйхатдан ўтказиш, кафолат йиғимини тўлаш ва туристга электрон туркод бериш учун ҳам жавобгар бўлиши назарда тутилган.
Эслатиб ўтамиз, лойиҳа доирасида «Хавфсиз туризм» жамғармасини ташкил этиш таклиф қилинмоқда. Ушбу жамғармадан саёҳатчиларга етказилган зарарни қоплаш ва уларни хориждан эвакуация қилиш харажатлари молиялаштирилади. Туроператорлар лицензия олиши учун жамғармада камида 50 минг доллар захира қилиб қўйиши талаб этилади, шунингдек, сотилган ҳар бир турпакетдан кафолат йиғими тўланади.
Хорижий турпакетни харид қилаётган ҳар бир туристга уникал электрон туркод бериш таклиф этилмоқда. Ушбу код саёҳатнинг Миллий туристик платформада рўйхатдан ўтказилганини, кафолат йиғими тўланганини ҳамда турист фавқулодда вазиятлар учун мўлжалланган ҳимоя тизимига киритилганини тасдиқлайди.