АҚШ президенти Дональд Трамп Канададан келтириладиган айрим товарлар импортига қўшимча 50 фоизли божлар жорий этди, деб хабар берди Оқ уй.
Гап Канаданинг бир қатор товарлари — «винодан тортиб ҳоккей таёқчалари ва цементгача» бўлган маҳсулотлар ҳақида бормоқда. Божлар энергия ресурслари, калийли ўғитлар, балиқ ва камёб ер металларига, шунингдек, АҚШ божлари аллақачон амал қилаётган товарларга татбиқ этилмайди.
Шу тариқа, Associated Press таъкидлаганидек, тарифлар Канада импортининг катта қисмига жорий этилади. Reuters нашрининг қўшимча қилишича, гап Канаданинг деярли 20 миллиард доллар қийматдаги маҳсулотлари ҳақида бормоқда.
«Шу тариқа, президент Трамп Канаданинг АҚШ савдосига нисбатан камситувчи муносабати етказган юк ва ноқулайликларни қопламоқда ҳамда Американинг муҳим экспорт маҳсулотлари — автомобиллар, алкоголь ва сут маҳсулотлари учун тенг имкониятлар яратмоқда», — дейди Оқ уй.
Трамп 1930 йилдаги «Тарифлар тўғрисида»ги қонунга ҳавола келтирди, ушбу қонун президентга хорижий маҳсулотларга Конгресс розилигисиз бож солиш имконини беради.
Бир неча кун олдин Трамп Канадада юз берган юзлаб ўрмон ёнғинлари АҚШ шимолининг катта қисмини тутун билан қоплаганидан сўнг Канадага нисбатан янги божлар жорий этиш билан таҳдид қилганди.
Ушбу таҳдид АҚШ қонунчиларининг ўрмон ёнғинлари бўйича эътирозлари ва Онтарио бош вазири Даг Форднинг АҚШга шикоят қилиш ўрнига ёнғинга қарши курашишда ёрдам беришни сўраб қилган мурожаати ортидан янграган.
«АҚШга ҳеч бир заруратсиз ифлос, заҳарли ва соғлиқ учун зарарли ҳаво бостириб кирмоқда», — деди Трамп ва Канаданинг «қасддан қилинган бепарволиги» сабабли янги божлар киритиш билан таҳдид қилди. Канада Ёввойи табиат ёнғинлари ахборот тизими маълумотларига кўра, ўтган шанба ҳолатига кўра мамлакатда 955 га яқин фаол ёнғин қайд этилган бўлиб, уларнинг аксарияти назоратдан чиқиб кетган.
- Дональд Трамп 2025 йилда иккинчи президентлик муддати бошида 180 та давлат ва ҳудудга нисбатан савдо божлари жорий этилишини эълон қилганди. Хусусан, Канададан келтириладиган айрим маҳсулотларга 25 фоизли божлар амал қилаётганди. Кейинчалик, мамлакатлар ўртасидаги яқин савдо муносабатларига қарамай, ушбу тарифлар 35 фоизгача оширилган.
- 2026 йилнинг февраль ойида АҚШ Олий суди президентнинг «Халқаро фавқулодда иқтисодий ваколатлар тўғрисида»ги қонун (IEEPA) бўйича ваколатларини божлар жорий этиш учун етарли эмас деб топди ва Трамп қонунни бузган деган қарорга келди. Трамп суд қарорини «шармандалик» деб атади ҳамда 1974 йилдаги «Савдо тўғрисида»ги қонун асосида барча импортга янги божлар жорий этилишини эълон қилди.