Президент Шавкат Мирзиёев раислигида ҳудудлар ва тармоқларда иқтисодий ўсиш суръатларини таъминлаш ҳамда йил якунигача устувор вазифаларга бағишланган видеоселектор йиғилиши бўлиб ўтмоқда.
Йиғилишда қайд этилганидек, жорий йилнинг биринчи ярмида мамлакат иқтисодиёти 8,5 фоизга ўсган. Жумладан, саноатда ўсиш 8 фоиз, хизматлар соҳасида 16,9 фоиз, қурилишда 13,8 фоиз, қишлоқ хўжалигида эса 4,7 фоизни ташкил этган.
Шунингдек, инвестициялар ҳажми 28 миллиард долларга, экспорт эса 14,4 миллиард долларга етган. «Fitch» ва «Moody’s» халқаро рейтинг агентликлари Ўзбекистоннинг суверен кредит рейтингини бир поғонага яхшилаган.
Давлат раҳбари 40 миллион аҳоли фаровонлигини таъминлаш учун мамлакат иқтисодиётида 9–10 фоизлик ўсиш суръатларига эришиш зарурлигини таъкидлади. Шу муносабат билан раҳбарлардан ҳисобот эмас, балки янги имкониятлар, аниқ режалар ва йил якунигача эришиладиган натижаларни тақдим этиш талаб қилинди.