Ўзбекистонда хусусий сектор билан ҳамкорликда ҳамкор давлатлардан бўш турган 10 мингта юк вагонини жалб қилиш чораларини ишлаб чиқиш топширилди. Бу ҳақда 21 июль куни бўлиб ўтган йиғилишда президент Шавкат Мирзиёев маълум қилди.
Давлат раҳбарининг сўзларига кўра, мамлакат ташқи савдо юкларининг 70 фоизи, яъни 46 млн тоннаси темирйўл орқали ташилади. Шунга қарамай, тадбиркорлар вагонлар етишмаслиги ва юк ташиш тизимидаги муаммолардан шикоят қилишда давом этмоқда.
Йил бошидан буён цемент ишлаб чиқарувчилар сўраган 2800 та вагон етказиб берилмаган. Президентнинг таъкидлашича, йилнинг иккинчи ярмида қўшимча 1300 та юк вагони ишлаб чиқариш режаси ҳам бизнес эҳтиёжини тўлиқ қопламайди.
Масъул идораларга ўн кун ичида хусусий сектор иштирокида ҳамкор давлатлардан бўш турган 10 мингта юк вагонини жалб қилиш бўйича ҳисоб-китобларни тайёрлаш топширилди.
Шунингдек, йиғилишда Ангрен-Поп, Тошғузор-Қумқўрғон ва Тошкент-Самарқанд темирйўл йўналишлари ортиқча юклама билан ишлаётгани ҳам қайд этилди.
Йил охиригача темирйўл инфратузилмасини ривожлантириш учун Жаҳон банкидан 200 млн доллар жалб қилиш бўйича келишувга эришиш вазифаси қўйилди.
Бош прокуратурага юк вагонлари паркларини кенгайтириш учун ажратилган маблағлардан фойдаланилишини текшириш, шунингдек, вагонларни тадбиркорларга тақдим этишнинг амалдаги тартибини ўрганиш топширилди. Текширув якунлари бўйича тизим шаффофлигини оширишга доир таклифлар киритилади.
Эслатиб ўтамиз, 2030 йилгача Ўзбекистонда 151 км янги темирйўл қуриш, 182 км мавжуд темирйўлни электрлаштириш, 27 та станция ва 100 км темирйўлни модернизация қилиш режалаштирилган. Шунингдек, шаҳар атрофи темирйўл қатновини ривожлантириш учун 15 та янги йўналишни очиш таклиф этилган.