Тошкент метрополитени Чилонзор йўналишининг «Чинор» бекати реконструкция сабаб 13 июндан 50 кунга ёпилганди. 29 июль куни бекат йўловчилар учун қайта очилди. Gazeta мухбири бекатда бўлган ўзгаришларни кўздан кечирди.
«Чинор» метро бекатининг реконструкциядан аввалги кўриниши:
Фото: Метрополитен матбуот хизмати
Фото: Метрополитен матбуот хизмати
Фото: Метрополитен матбуот хизмати
Метрополитен маъмуриятига кўра, «Чинор» бекатини реконструкция қилишга туртки берган асосий ҳолат — йўловчиларнинг киришда, турникет олдида қаторлашиб тўпланиб қолгани. Шунга кўра, бекатда аввал мавжуд бўлган 6 та турникет 13 тага етказилган. Она ва бола хонаси, ҳожатхона, чипта берувчи аппаратлар ташкил қилинган.
«Чинор» бекати раҳбари Абдураҳмон Абдуғаффоровнинг айтишича, бекат кунига 15−20 мингга яқин йўловчига хизмат кўрсатиб келган. Эндиликда эса 35−40 минг йўловчини қабул қилиш имконияти бўлади.
«Реконструкция давомида „Чинор“ ва „Янгиҳаёт“ бекатлари оралиғида йўловчиларни ташиш учун вақтинча 6 та кондиционерли, шинам метробус ҳаракати йўлга қўйилди. Интервал вақтлари ҳам икки-уч дақиқага мўлжалланди», — дейди Абдураҳмон Абдуғаффоров.
Абдураҳмон Абдуғаффоров
«Чинор» Чилонзор йўналишининг охирги бекати. Ундан ерусти ҳалқа йўлининг «Қипчоқ» бекатига чиқиш мумкин. «Қипчоқ»га ўтиш учун орадаги автомобил йўлини юқоридаги кўприк узра кесиб ўтишга тўғри келади. Бунга ўртача 1,5−2 дақиқа вақт кетади. Кўприкка лифт ёрдамида ҳам чиқиш мумкин.
Реконструкциядан сўнг «Чинор» бекатининг кириш эшиклари кенгайтирилган. «Қипчоқ»дан келадиган йўловчилар кўприкдан тушиб, тўғри бекатга киришлари учун алоҳида эшик очилган. Лекин бир бекатдан чиқиб, иккинчисига тўлов қилмасдан ўтиш имконияти бундан мустасно. Чунки «Қипчоқ»дан келадиган йўловчини «Чинор»да 6 та турникет қарши олади.
Чап томонда «Қипчоқ» бекатидан ўтиб келаётган йўловчилар
«„Чинор“ бекатига бир томонлама зинадан Сергели-1, Спутник-16, Дўстлик-2 даҳалари ва „Қипчоқ“ бекатидан йўловчи оқими кўп келар, ҳамма битта жойга тақалиб қоларди. Бугун, мана, биринчи кун, эрталабки тиғиз пайтимиз ўтди. Бекатда тиқилинч бўлмади. Платформага чиқиш учун кенг йўлак ҳосил бўлди», — дея таъкидлайди бекат раҳбари.
Беҳруз Қурбонов ишга бориш учун ҳар куни «Чинор» бекатидан метрога тушади. Унгача Зангиотадан автобусда келади. Унинг фикрича, «Чинор» ва «Қипчоқ» бекатларидан «пересадка» қилиш учун алоҳида тўловни бекор қилиш керак.
«Метродаги ҳамма ўтиш йўлари бепул. Масалан, Дўстлик ва Технопарк бекатларида ҳам шундай. Балки бу ерда ҳам шунақа ечим қилинса, яхшироқ бўлса керак», — дейди у.
Беҳруз Қурбонов
Тошкент Метрополитени етакчи мутахасиси Дониёр Нуруллаевнинг таъкидлашича, ҳозирча Ерусти ҳалқа йўлининг «Қипчоқ» ва Чилонзор йўлининг «Чинор» бекатлари орасида бепул «пересадка»га имкон яратиш режалаштирилмаган.
«Чинор»нинг иккинчи чиқиш томонида аввал битта лифт бўлган. Ҳозир бу қисмда жами 4 та лифтни ўрнатиш ишлари ҳамон давом этяпти. Лифт сиғими 10 нафар йўловчига мўлжалланган.
«Чинор» бекатида жами 38 нафар ходим ишлайди. Булар — фаррошлар, чиқиш назоратчиси, поъездларни текшириш ва жўнатиш бўйича навбатчилар, марказлаштирилган пост навбатчилари ва бекат навбатчилари.
Нозимабону Маматова 3 йилдан буён метрополитенда бекат навбатчиси бўлиб ишлайди. У биринчи кун соат 08:00 дан 20:00 гача, иккинчи кун соат 20:00 дан 08:00 гача (тунги сменада) ишлайди. Шундан кейин 2 кун дам олади.
Унинг вазифасига йўловчилар тартиб қоидаларга амал қилишини назорат қилиш ва уларга турникетдан ўтишда ёрдам бериш ишлари киради.
«Авваллари тирбанд бўлмаган пайтлари 4 та турникет ишларди. Тирбандлик юзага келса, кириш қисмини кенгайтириб, қўшимча иккита турникетни ишлатар эдик. Одатда соат 07:00 дан 09:00 гача ва 16:00 дан 21:00 гача йўловчилар оқими кўпроқ бўлади», — дейди бекат навбатчиси.
Тошкент метрополитени матбуот хизмати етакчи мутахассиси Дониёр Нуруллаевнинг маълум қилишича, келгусида йўловчилар оқими кўп бўлган бошқа метро бекатларида ҳам кенгайтириш ва турнекетлар сонини ошириш ишлари амалга оширилиши режалаштирилган.
Gazeta мухбири «Қипчоқ»дан кейинги бекат — 16 июль куни «том конструкциясининг қисмида силжиб тушиш» ҳолати рўй берган «Турон»да ҳам бўлиб, авариядан кейинги ҳолатни тасвирга олди. Бекатнинг қулаб тушган том қисми йиғиштириб олинган. Бундай ҳолатни «Қипчоқ» бекатида ҳам кўриш мумкин.
«Турон» метро бекати
«Қипчоқ» метро бекати