Қашқадарёда ОИТСга қарши курашиш маркази лаборанти экспертиза хулосасини фуқаро фойдасига ҳал қилиб бериш эвазига пора олаётганда ушланди. Бу ҳақда Давлат хавфсизлик хизмати хабар қилди.
Қайд этилишича, Қашқадарё вилояти ОИТСга қарши курашиш марказининг туманлардан биридаги ОИВ диагностика лабораторияси лаборанти 1996 йилда туғилган фуқаро бўйича тайинланган экспертиза хулосасини мансабдор танишлари орқали унинг фойдасига ижобий ҳал қилиб бериш эвазига 3 минг АҚШ доллари олган вақтида ашёвий далиллар билан ушланган.
Тезкор тадбир давом эттирилиб, лаборантдан 2,5 минг АҚШ долларини олган Республика суд-тиббий экспертиза илмий-амалий марказининг туман бўлими бошлиғи ҳам қўлга олинган.
Шунингдек, Андижон вилоятида «Андижон сув таъминоти» АЖнинг туман филиалларидан бири бошлиғи мансабдор танишлари орқали фуқаронинг янги қурилган хонадонига оқава сув тармоғи тортиш учун рухсат олиш ва канализация насоси ўрнатишда ёрдам бериш эвазига 8,5 минг АҚШ доллари талаб қилган.
ДХХ, Бош прокуратура ҳузуридаги Департамент ва ички ишлар органлари ходимлари ҳамкорлигида ўтказилган тезкор тадбирда ушбу мансабдор сўралган пулни учинчи шахс орқали олган вақтида ушланган.
Ҳар икки ҳолат юзасидан Жиноят кодексининг тегишли моддалари билан жиноят ишлари қўзғатилган. Ҳозирда тергов ҳаракатлари олиб борилмоқда.
