Тармоқларда 2 август куни New Port турар жой мажмуаси мансабдор шахслари Дамариқ МФЙ, Абдулла Қаҳҳор кўчаси 19-уйда яшовчи фуқароларга компенсация пуллари тўлиқ тўланмаётгани ва уй ноқонуний бузилаётгани ҳақида видеомурожаат тарқалган эди.
Тошкент шаҳар прокуратураси ўтказган терговга қадар текширувда Mega Logistics Servise МЧЖ мансабдор шахслари мазкур манзилдаги фуқароларни мажбурий кўчириш бўйича ижро ҳаракатлари якунланмаган бўлса-да, уйни ўзбошимчалик билан бузиб ташлагани аниқланган.
Шунингдек, компания қурилишга тегишли рухсатнома олмасдан ушбу ҳудудда 1 та 20 қаватли, 2 та 19 қаватли, 1 та 12 қаватли ва 1 та 2 қаватли турар жой биносини ўзбошимчалик билан қургани маълум бўлган.
Текширув якунларига кўра, Mega Logistics Servise МЧЖ мансабдор шахслари ва бошқа шахсларга нисбатан жиноят иши қўзғатилди. Дастлабки тергов Тошкент шаҳар прокуратураси томонидан олиб борилмоқда.
Прокуратура маълум қилишича, жиноят иши тергови алоҳида назоратга олинган ва унинг якуни бўйича қонуний қарор қабул қилинади.
2025 йил октябрида президент ноқонуний қурилишларни тезкор ўрганиш ва бартараф этиш тизимини яратишни буюрганди
Март ойида эса қурилиш вазири 2018−2023 йилларда Ўзбекистонда 570 та қўп қаватли уй, яъни 38 мингта хонадоннинг ноқонуний қурилгани бўйича тадбиркорларга жиноий иш қўзғатилгани ҳақида айтганди.
Аввалроқ Тошкентнинг Яшнобод туманидаги «Чўлпон» маҳалласи аҳолиси бир йилдан ортиқ вақтдан бери бузиб ташланган маҳалла қўмитаси, футбол майдони ва болалар майдончасининг бир қисми ўрнида кўп қаватли бино қурилишини тўхтатишга уриниши ҳақида ёзгандик. Материалимиздан сўнг, у ердаги қурилиш бекор қилинди.
Яқинда ПА раҳбари Саида Мирзиёева маҳаллалардан бирига ташриф буюриб, пойтахт бўйлаб ҳовлиларни ободонлаштириш лойиҳаларининг қонунийлиги текширила бошлаганини эълон қилди.