2026 йил январ–июн ойларида қурилиш соҳасида фаолият юритувчи корхоналар томонидан давлат бюджетига жами 5 трлн 210 млрд сўм солиқ тўланган.
Маълумотларга кўра, мазкур соҳада 33 425 та юридик шахс фаолият юритмоқда. Уларнинг умумий товар айланмаси 95,4 трлн сўмни ташкил этган, қўлланган солиқ имтиёзлари ҳажми эса 1 трлн 510,2 млрд сўмга етган.
Энг кўп солиқ тўлаган 20 та қурилиш компанияси томонидан 1 трлн 94,5 млрд сўм солиқ тўланган бўлиб, бу соҳа бўйича жами солиқ тушумларининг 21 фоизига тенг. Ушбу компанияларнинг товар айланмаси 14,15 трлн сўм, қўлланган солиқ имтиёзлари эса 133,3 млрд сўмни ташкил қилди.
Ярим йиллик якунларига кўра, энг кўп солиқ тўлаган қурилиш компаниялари рўйхатини «Discover Invest» МЧЖ 189,9 млрд сўм билан бошқарди. Кейинги ўринларда «UET Construction» МЧЖ (189,3 млрд сўм) ва «To‘palang HPD Holding» МЧЖ (109,6 млрд сўм) жой олди.
Шунингдек, «Trest-12» АЖ 63,1 млрд сўм, «Agromir Buildings» МЧЖ эса 60,9 млрд сўм солиқ тўлаган ҳолда биринчи бешликдан ўрин олган.
Қолган йирик солиқ тўловчилар қаторида «KOC Construction Mexanik Elektrik» МЧЖ ХК, «O‘zshahar Qurilish Invest» МЧЖ, «Bir Inshaat» МЧЖ, «Gold Step Invest» ва «Eco Greenland» МЧЖ каби компаниялар ҳам қайд этилган.
Энг йирик 20 та қурилиш компанияси тўлаган солиқларнинг асосий қисми қўшилган қиймат солиғи ҳиссасига тўғри келди. Ушбу турдаги тушум 434,1 млрд сўмни ташкил қилди.
Шунингдек, фойда солиғидан 274 млрд сўм, жисмоний шахслардан олинадиган даромад солиғидан 191,4 млрд сўм, ижтимоий солиқдан 174,7 млрд сўм ва бошқа солиқлар бўйича 20,2 млрд сўм бюджетга ўтказилган.