Тошкент шаҳри Яккасарой туманидаги Newport турар жой мажмуасининг тўққизта блокидан олтитасида қурилиш-монтаж ишлари ҳудудий инспекцияда рўйхатдан ўтказилмасдан олиб борилган. Бу ҳақда Қурилиш ва уй-жой коммунал хўжалиги вазирлиги матбуот хизмати хабар берди.
Вазирлик ижтимоий тармоқларда Mega Logistics Service қурилиш компанияси томонидан олиб борилаётган қурилишга назорат органлари гўёки етарлича эътибор қаратмагани ҳақида тарқалган хабарларга муносабат билдирди.
Идора маълумотларига кўра, компанияга тегишли ҳудудда тўққизта блок қурилмоқда. Уларнинг учтаси бўйича Архитектура ва шаҳарсозлик кенгаши ишчи органи ва экспертизанинг ижобий хулосалари мавжуд. Ушбу объектларда ишларнинг бошланиши Тошкент шаҳри Қурилиш ва уй-жой коммунал хўжалиги соҳасида назорат қилиш ҳудудий инспекциясида рўйхатдан ўтказилган.
Шу билан бирга, қолган олтита блокда қурилиш ишлари белгиланган тартибда инспекцияда рўйхатдан ўтказилмасдан олиб борилган. Қоидабузарликлар назорат тадбирлари давомида аниқланган.
Вазирлик хабарига кўра, буюртмачи — Mega Logistics Service компаниясига бир неча бор бажарилиши мажбурий бўлган ёзма кўрсатмалар берилган. Компания зиммасига ишларни тегишли шаҳарсозлик ҳужжатлари асосида олиб бориш ва объектларни инспекцияда рўйхатдан ўтказиш мажбурияти юклатилган.
Бироқ кўрсатма талаблари бажарилмаган, дейилади хабарда. Шундан сўнг компаниянинг масъул мансабдор шахслари маъмурий жавобгарликка тортилган. Таъсир чоралари, шунингдек, буюртмачининг техник назорат бўйича мутахассисига нисбатан ҳам қўлланган.
Инспекция томонидан тўпланган ҳужжатлар ҳуқуқий баҳо бериш учун ҳуқуқни муҳофаза қилувчи органларга юборилган.
«Мазкур объектда аниқланган қонунбузилиш ҳолатлари инспекция томонидан эътиборсиз қолдирилмаган. Аксинча, улар юзасидан белгиланган тартибда назорат тадбирлари ўтказилиб, ваколат доирасида тегишли таъсир чоралари қўлланилган ҳамда қонунбузилишларга ҳуқуқий баҳо берилишини таъминлаш бўйича зарур чоралар кўрилган», — дея қайд этди вазирлик.
Аввалроқ Тошкент шаҳри прокуратураси Newport ТЖМ лойиҳасини амалга ошираётган Mega Logistics Service мансабдор шахсларига нисбатан жиноят иши қўзғатган эди. Бунга Дамариқ маҳалласидаги хонадонни мажбурий кўчириш жараёни якунланмасдан туриб бузиб ташлангани асос бўлган. Жиноят кодексининг қайси моддалари бўйича иш қўзғатилгани ва айбланувчилар ошкор қилинмаган.
Низо оиланинг 2,75 сотикли ер майдони билан боғлиқ. 2024 йилнинг ноябрь ойида суд уни 2,28 миллиард сўм компенсация тўлаган ҳолда олиб қўйиш ҳақида қарор чиқарган. Мулк эгалари компенсация миқдорига рози бўлишмаган ва уйни тарк этишдан бош тортишган.
30 майдан буён бузилган уй эгалари ноқонуний кўчириш, қурувчи томонидан бўлаётган тазйиқ ва уйнинг бузилиши ҳақида сўз юритилган ўнлаб видеоларни жойлаштирган. Улар на туман ва юқори судларда, на туман, шаҳар ва республика прокуратураларида ҳимоя топмаганини таъкидлаган. Шаҳар расмийлари эса вазиятга фақат август ойи бошида очиқ муносабат билдирган.
Аҳоли уйни сақлаб қолишга ҳаракат қилган, бироқ бунинг уддасидан чиқа олишмаган. Кейинчалик уй бузиб ташланган.
Уй эгаларидан бири Рустам Паянов ва унинг онаси уй бузилгач, оила бошпанасиз қолганини ҳамда тўланган компенсация хонадон сотиб олишга етмаслигини маълум қилган. Улар Саида Мирзиёевадан ушбу вазиятга эътибор қаратишни сўраган.
Прокуратура маълумотларига кўра, қурувчи ушбу ҳудудда тегишли рухсатномасиз бешта: битта 20 қаватли, иккита 19 қаватли, битта 12 қаватли ва битта 2 қаватли турар жой биноси қурган.