Миграция агентлигида 1 млрд сўмдан ортиқ бюджет маблағининг талон-торож қилингани аниқланди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар берди.
Маълум қилинишича, Департаментнинг Тошкент шаҳар бошқармаси томонидан ўтказилган терговга қадар текширувда агентликнинг масъул шахслари бюджет маблағларини ўзлаштиришга алоқадор экани аниқланган.
Текширув натижаларига кўра, агентлик ходимлари Б.Д. ва Н.А. амалда ишламаган даври учун уларга 931,6 млн сўм иш ҳақи ҳисобланиб тўланган.
Шунингдек, интизомий жазо чораси қўлланилган ва мазкур жазо амал қилиб турган даврда Меҳнат кодекси талабларига зид равишда яна 8 нафар ходимга жами 88,5 млн сўм тўлаб берилган.
Ушбу ҳаракатлар оқибатида жами 1 млрд 20,1 млн сўм бюджет маблағи растрата йўли билан талон-торож қилинган.
Мазкур ҳолат юзасидан Жиноят кодексининг 167-моддаси (Ўзлаштириш ёки растрата йўли билан талон-торож қилиш) билан жиноят иши қўзғатилган. Ҳозирда тергов ҳаракатлари олиб борилмоқда.
