Июнь ойида миллий валютадаги банк кредитлари бўйича ўртача фоиз ставкаси май ойидаги 22 фоиздан кейин йиллик 21,6 фоизгача пасайди. Бу ҳақда Марказий банк маълумотларида келтирилган.
Ўтган йилнинг июнь ойига нисбатан қарз маблағлари қиймати 1,4 фоиз бандига камайган. Ўшанда ўртача ставка 23 фоизни ташкил этган.
Пасайиш ҳам қисқа муддатли, ҳам узоқ муддатли кредитларда кузатилди. Муддати бир йилгача бўлган кредитлар бўйича ўртача ставка бир ой олдинги 21,6 фоиз ва 2025 йил июнидаги 22,3 фоизга нисбатан 21,5 фоизгача тушди.
Муддати бир йилдан ортиқ кредитлар эса ўртача йиллик 21,7 фоиз ставкада берилди. Бир ой ичида ставка 0,5 фоиз бандига, бир йилда эса 1,5 фоиз бандига пасайди.
Имтиёзли кредитлар бўйича ставка эса 10,1 фоизгача (+0,1 фоиз банди) ошди.
Аҳолига кредитлар
Июнь ойида жисмоний шахсларга сўмда берилган кредитлар бўйича ўртача ставка бироз ошиб, йиллик 21,3 фоиздан 21,4 фоизгача кўтарилди. Шу билан бирга, ўтган йилнинг июнь ойига нисбатан у 1,9 фоиз бандига пасайган.
Энг қиммат кредитлар муддати бир йилгача бўлган кредитлар бўлиб қолди. Уларнинг ўртача ставкаси май ойидаги 26,8 фоиз ва бир йил аввалги 28,2 фоизга нисбатан йиллик 26,2 фоизни ташкил этди.
Аксинча, аҳоли учун узоқ муддатли кредитлар бўйича ставка бироз ошиб, 21,2 фоиздан 21,3 фоизгача кўтарилди. 2025 йил июнь ойида банклар бундай кредитларни ўртача йиллик 23,2 фоиз ставкада берган.
Бизнесга кредитлар
Июнь ойида юридик шахсларга миллий валютада берилган кредитлар бўйича ўртача ставка 21,8 фоизгача (−0,7 фоиз банди) пасайди. Бу 2023 йил октябридан буён энг паст даража бўлди. Ўшанда мазкур кўрсаткич 21,1 фоизни ташкил этган.
Бир йил ичида кўрсаткич 1 фоиз бандига камайди.
Муддати бир йилгача бўлган корпоратив кредитлар бўйича ставка май ойидаги 21,5 фоиз ва ўтган йил июнидаги 22,1 фоизга нисбатан 21,3 фоизгача пасайди.
Бир ой ичида энг сезиларли пасайиш узоқ муддатли кредитлар сегментида кузатилди. Муддати бир йилдан ортиқ бизнес кредитлари бўйича ўртача ставка йиллик 23,5 фоиздан 22,2 фоизгача тушди. Бу 2025 йил июнь ойидаги даражадан 1,1 фоиз бандига паст.
Валютадаги кредитлар
Июнь ойида хорижий валютадаги банк кредитлари бўйича ўртача ставка деярли ўзгармади ва йиллик 10,3 фоизни ташкил этди. Май ойида ҳам бу кўрсаткич тахминан 10,3 фоиз даражасида бўлган.
Ўтган йилнинг июнь ойига нисбатан валютадаги кредитлар 0,4 фоиз бандига қимматлашди — 9,9 фоиздан.
Муддати бир йилгача бўлган валютадаги кредитлар бўйича ўртача ставка май ойидаги 9,6 фоиздан июнь ойида 9,3 фоизгача пасайди. Бир йил аввал бу кўрсаткич 9,7 фоизни ташкил этган.
Аксинча, узоқ муддатли валютадаги кредитлар бўйича ставка май ойидаги 10,7 фоиздан кейин йиллик 10,9 фоизгача ошди. Ўтган йилнинг июнь ойига нисбатан ставка 0,9 фоиз бандига кўтарилган.
Шунингдек, июнь ойида миллий валютадаги депозитларнинг ўртача номинал даромадлилиги май ойидаги 17,1 фоиздан кейин йиллик 17,6 фоизгача ошган. Шу билан бирга, аҳоли депозитлари бўйича ставкалар пасайишда давом этиб, 2021 йил март ойидан буён энг паст даража — 19,2 фоизга етди. Бундай депозитларнинг реал даромадлилиги 8,3 фоизни ташкил қилди (ўтган йилга нисбатан юқори).
Июнь ойида Марказий банк раиси Тимур Ишметов кредитлар бўйича ставкаларнинг пасайиши секин ва босқичма-босқич кечадиган жараён бўлишини айтган эди. Унинг сўзларига кўра, кредит ставкалари инфляция, инфляцион кутилмалар, ресурслар қиймати ва молиявий хатарларга боғлиқ, депозитлар бўйича юқори ставкалар эса кредитлар қийматига бевосита таъсир кўрсатади.