Жанни Инфантино Халқаро футбол федерацияси (ФИФА) президенти лавозимида ишлашда давом этади. Бу ҳақда ФИФА раҳбариятининг Марокаш пойтахти Работ шаҳрида бўлиб ўтган мажлиси якунлари бўйича эълон қилинган ташкилот баёнотида сўз боради.
Қайд этилишича, ФИФА бош котиби Маттиас Графстрём ва ташкилот бошқаруви аъзолари Инфантинога «тўлиқ қўллаб-қувватлашини тасдиқлаган».
Sky News телеканали маълумотларига кўра, Инфантино ва Графстрём миллий футбол ассоциацияларига мактуб йўллаб, унда Жаҳон чемпионатидаги улушни хусусий инвесторларга сотиш режалари амалга оширилаётган пайтда йўл қўйилган хатолар учун узр сўраган.
«Биз ушбу хатолар учун чин дилдан узр сўраймиз ва улар бошқа ҳеч қачон такрорланмаслигига ваъда берамиз», — дейилади мактубда. Шу билан бирга, унда мактуб муаллифлари ФИФА режаларининг ОАВга сиздириб юборилишини ҳам хато деб ҳисоблашлари қайд этилган.
Июль ойи охирида Инфантино Жаҳон чемпионатларидаги улушларни хусусий инвесторларга сотишга қарор қилгани маълум бўлганди. Тахминларга кўра, ҳуқуқларнинг қарийб 20 фоизини АҚШ президенти Дональд Трампнинг куёви Жаред Кушнернинг укаси Жошуа Кушнер бошчилигидаги хусусий инвесторлар гуруҳи олиши керак бўлган.
Янги тижорий ҳуқуқлар тахминан 4,2 миллиард доллар маблағ жалб қилиши мумкин эди, дея қайд этди Reuters.
Бу ғоя миллий футбол федерацияларининг кескин танқидига сабаб бўлди. Жумладан, УЕФАнинг барча 55 та иштирокчи номидан эълон қилинган расмий баёнотида, агар улушни сотиш тўғрисида қарор қабул қилинса, ташкилот Жаҳон чемпионатларини бойкот қилиши айтилганди. Инфантинонинг лойиҳасидан норозиликни, шунингдек, Мадриднинг «Реал», Туриннинг «Ювентус», Мюнхеннинг «Бавария» ва Дортмунднинг «Боруссия» каби йирик футбол клублари ҳам билдирган.
ФИФА 1 август куни Жаҳон чемпионатидаги улушларни хусусий инвесторларга сотиш режаларидан воз кечганини эълон қилган.
Ўз навбатида, ФИФА томонидан 2030 йилги Жаҳон чемпионатини 48 та жамоадан 64 тагача кенгайтириш режасини ўрганиш учун берилган тўрт ҳафталик «жуда қисқа баҳолаш муддати» ҳам танқид қилинмоқда. Агар 43 та ёки ундан ортиқ ФИФА аъзо ассоциациялари расмий ёзма сўров юборса, навбатдан ташқари конгресс чақирилиши мумкин.
Инфантино 2016 йилдан бери ФИФА президенти лавозимини эгаллаб келмоқда. Унинг ушбу лавозимдаги иккинчи муддати 2027 йилда ўз ниҳоясига етади. Аввалроқ у янги, тўрт йиллик муддатга сайланиш режалари ҳақида хабар берганди.