Бўрижар каналида чўкаётган 13 ёшли болани пост-патруль хизмати инспектори қутқариб қолди. Бу ҳақда Тошкент шаҳри Яккасарой тумани ҳокимлиги матбуот котиби маълум қилди.
Қайд этилишича, пост-патруль хизмати инспектори Расул Жўраев Бўрижар каналида 13 ёшли Муҳаммад Ғайратнинг чўкаётганини кўриб қолган. У бир зум ҳам иккиланмай сувга сакраб, болани қутқариб, соҳилга олиб чиққан.
Ижтимоий тармоқларда тарқалган видеода сувда яна бир шахси аниқланмаган эркак ҳам бўлгани қайд этилган. У инспектор билан бирга болага панжара билан ўралган соҳилгача етиб олишга ёрдам берган. Кейинроқ воқеа жойига етиб келган фуқаролар болани сувдан чиқариб олган.
Июль ойида Тошкентдаги Бўзсув каналида чўкаётган аёлни қутқаришга уринган Миллий гвардия ходими ҳалок бўлганди.
