Коррупцияга қарши курашиш агентлиги берган маълумотга кўра, 2026 йил биринчи чорагида энг кўп коррупцион жиноятлар маҳаллий ҳокимликлар, таълим ва соғлиқни сақлаш соҳаларида содир этилган. Кейинги ўринларни тижорат банклари, газ ва электр таъминоти, бандлик йўналишлари эгаллаган.
Агентлик коррупция хавфи юқори бўлган ана шундай 23 та давлат ташкилотларининг ходимлари ва раҳбарлик лавозимида бўлганларни «коррупциянинг оқибатлари билан таништириш» мақсадида навбатма-навбат жазони ижро этиш колониясига олиб бормоқда.
Молия вазирлиги ва Солиқ қўмитаси ходимлари. Фото: Telegram / @antikor_uzb
Шу кунгача Қурилиш, Адлия, Бандлик, Молия, Олий таълим, Мактабгача ва мактаб таълим вазирликлари ҳамда Солиқ қўмитаси ходимлари Олмалиқдаги қамоқхонада бўлишган. Маҳкумларнинг яшаш шароити, колониядаги вазият билан яқиндан танишган. Ҳозирча улар орасида вазирлар, қўмита раислари, ҳокимлар кўринмайди.
Шу тадбирлар доирасида 30 июль куни Антикоррупция агентлиги ИИВ ҳамкорлигида Қишлоқ хўжалиги ва Сув хўжалиги вазирликлари ҳамда Автомобил йўллари қўмитаси ходимлари учун Олмалиқ шаҳридаги 14-сонли ЖИЭКга профилактик ташриф уюштирди. Унда Gazeta мухбири ҳам иштирок этди.
ЖИЭК бошлиғи ўринбосари, майор Баҳром Жамоловнинг таъкидлашича, иқтисодий турдаги жиноят содир қилган маҳкумларнинг салмоғи олдинги йилларга нисбатан ошган.
«МИБ томонидан қўйилган ундирув масаласига ҳам катта эътибор қаратамиз. Давлат ва фуқаролардан моддий қарзи бор маҳкумларни нисбатан юқори маош тўланадиган ишларга жалб қиламиз. Бу оғир юкламали ишлар бўлиши ҳам мумкин. Улар оладиган энг кўп маош 8 млн сўм ва ундан кўпроқ бўлади», — дейди Жамолов.
Баҳром Жамолов
Унинг айтишича, колонияда 200 нафар ОИТС билан касалланган маҳкум бор, улар алоҳида тартибда жазо ўтайди. Озодликка чиқишидан олдин ҳудудий соғлиқни сақлаш бўлими, ИИБ, МФЙга хат юборилиб, огоҳлантирилади.
«500 нафар маҳкумни кўришга ҳеч ким келмайди. Қамалгани учун барча яқинлари улардан воз кечиб кетган. Яқинлари хабар оладиган маҳкумлар ҳам 3 ойда бир кўришиши мумкин. Умуман, бу ер ҳавас қиладиган жой эмас», — дейди Баҳром Жамолов қамоқхона билан танишишга келган давлат ташкилотлари ходимларига.
Майор ходимларнинг нималарга кўпроқ қизиққани, қандай саволлар бергани ҳақида ҳам гапирди. Уларни, асосан, иқтисодий турдаги жиноятлар содир қилган маҳкумларнинг қайси ишларга йўналтирилиши, жазони ўташ тартиби — осон ё қийинлиги қизиқтирган.
«Бу ерга келганимдан сўнг инсон тақдири, қонунга ҳурмат ва жамият олдидаги масъулият ҳақида чуқурроқ ўйлай бошладим. Коррупция орқали эришилган ҳар қандай манфаат вақтинчалик, унинг оқибати эса инсоннинг эркинлиги, обрўси, оиласи ва келажагига жиддий зарар етказади. Шунинг учун ҳар қандай ноқонуний таклиф ёки ҳаракатдан мутлақо воз кечиши керак», — дейди Сув хўжалиги вазирлиги мутахассиси Абдухалил Холматов.
Колонияда 100 га яқин хорижлик маҳкумлар ҳам жазо ўтайди. Баҳром Жамолов уларга ўзбек тили ва Ўзбекистон мадҳиясини ўрганиш учун уч ой муҳлат берилишини айтди. Бунинг учун уларга ўзбекзабон маҳбуслар бириктирилади.
Маълум бўлишича, ушбу колонияда «Док-1 Макс» иши билан 20 йилга озодликдан маҳрум этилган Сингх Рагвендра Пратап ҳам жазо ўтаб келмоқда. Бироқ у билан суҳбатлашишнинг имкони бўлмади.
«Агентлик бу учрашувларни шунчаки тадбир сифатида кўрмаяпти. Хар бир ташриф ва кейинги босқичлар назорат ва таҳлил қилинади. Вазирлик ва идораларнинг ички назорат тузилмалари томонидан ходимларнинг фаолияти ўрганилади, коррупция хавфи юқори йўналишлар қайта кўриб чиқилади», — дейди Антикоррупция агентлиги матбуот хизмати раҳбари Шерзод Сапаров.
Агентлик август-сентябрь ойларида Экология қўмитаси, Маданият вазирлиги, «Ўзсувтаъминот», «Ҳудудий электр тармоқлари», «Ҳудудгазтаъминот», «Ўзбекистон темир йўллари», «Ўзбекнетфгаз», Тошкент шаҳар ва Тошкент вилояти ҳокимликлари, тижорат банклари раҳбарлари ва масъул ходимларининг ЖИЭКга таширифини амалга оширишни режалаштирган.
Кўпроқ суратлар:
