Таниқли киноактёр, режиссёр ва педагог Абдуманнон Убайдуллаев 86 ёшида вафот этди. Бу ҳақда Ўзбекистон Киноарбоблари ижодий уюшмаси маълум қилди.
Абдуманнон Убайдуллаев Зулфиқор Мусоқовнинг 2006 йилда суратга олинган «Ватан» фильмидаги роли орқали кенг оммага танилди. Ўшанда у 66 ёшда эди. Шундан сўнг у «Омад», «Сўнгги лаҳза», «Алданган кўнгил», «Ҳижрон» ва бошқа бир қатор фильмларда, шунингдек, кўплаб телесериалларда рол ижро этди.
Актёрлик фаолиятини бошлашидан аввал болалар радиосида режиссёр бўлиб ишлаган. Кейин Қашқадарёдаги театрда фаолият юритган, сўнгра «Табассум» номли радио журнални тайёрлаган.
Санъатшунослик фанлари номзоди, ёшлар билан ишлаш соҳасида хизмат кўрсатган арбоб бўлган Абдуманнон Убайдуллаев Давлат санъат ва маданият институтининг овоз режиссёрлиги ва операторлик маҳорати кафедрасида дарс берган.
У 2023 йилда Kun нашрига берган интервьюсида шундай деган эди: «Агар катта меҳнат билан тўплаган билиминг бўлса, уни албатта кимгадир етказишинг керак».
Шунингдек, Маданият институтига ўқишга киришда айнан режиссёрлик мутахассислигини танлаганини, бунга актёрлар режиссёрга бўйсуниши асосий сабаб бўлганини ҳам сўзлаб берган.
