Президент Шавкат Мирзиёев 18 август куни Хоразм вилоятида тадбиркорлар билан ўтказилган очиқ мулоқотда экспортни ошириш ва хорижий бозорларда миллий брендларни илгари суриш бўйича янги чора-тадбирларни эълон қилди.
Давлат раҳбари ташқи бозорлар учун рақобат кучаяётганини таъкидлади. Учрашувда келтирилган маълумотларга кўра, экспортчиларнинг 40 фоизи хорижий мижозларни топишда, 36 фоизи стандартлар ва сертификатлаш талабларини бажаришда қийналмоқда, 37 фоизига муносиб молиявий инструментлар, 33 фоизига эса маркетинг, брендинг ва бозорлар таҳлили бўйича компетенциялар етишмаяпти.
Экспорт тушуми бўйича енгилликлар
Чора-тадбирларнинг алоҳида блоки муддати ўтган экспорт қарздорлиги ва валюта тушумига тааллуқлидир.
Агар йил охиригача қарздорликни узиш учун банк ҳисобрақамига хорижий валюта киритилса, уни экспорт тушуми сифатида ҳисобга олишга рухсат берилади.
Бундан ташқари, илгари етказиб берилган товар учун тўлов ҳанузгача келиб тушмаган ҳолатларда экспортга қўйилган чекловларни олиб ташлаш режалаштирилмоқда.
Инвойс бўйича 50 фоизлик олдиндан тўлов талаби ҳам бекор қилинади. Савдо уйлари ва дистрибьюторлар орқали экспорт қилишда валюта тушуми келиб тушиши муддати 180 кундан 365 кунгача узайтирилади.
«Экспорт навигатори»
Хорижий бозорларга чиқишнинг ситемали босқичларида бизнесни комплекс кузатиб бориш учун «Экспорт навигатори» тизимини ишга тушириш режалаштирилмоқда.
Хорижда харидоргир бўлган 100 та товар рўйхати шакллантирилади. Уларнинг ҳар бири бўйича рақобат муҳити, тариф шароитлари ва логистика ечимлари ишлаб чиқилади.
2000 та корхонанинг ишлаб чиқариш жараёнлари ташқи бозорлар ва харидорларнинг алоҳида сегментлари талабларига мослаштирилади.
Тадбиркорларга хорижий брендмейкерни жалб қилиш харажатларининг ярми — 500 минг долларгача бўлган қисми қоплаб берилади.
Миллий брендни хорижда илгари суриш ва уни халқаро талабларга мослаштириш учун 50 минг долларгача субсидиялар назарда тутилади.
Бундан ташқари, давлат маҳсулотларни омборларга жойлаштириш ва маркетплейслар орқали сотиш харажатларининг 50 фоизини, шунингдек, халқаро тендерларда иштирок этиш учун консалтинг харажатларининг 80 фоизини қоплайди.
Экспортчиларни қўллаб-қувватлашнинг ягона тизимига камида 1 миллиард доллар йўналтирилади.
«Бугун дунёда бозор учун кураш кун саин кучайиб боряпти. Бундай вазиятда хорижга чиққан тадбиркор ҳеч қачон ўзини ёлғиз ҳис қилмаслиги керак», — деди Шавкат Мирзиёев.
25 та мамлакатда «экспорт элчилари»
Президент, шунингдек, ўзбек бизнесини хорижда илгари суришда дипломатик ваколатхоналар ролини кучайтиришни топширди.
Элчилар тадбиркорларга янги бозорларга чиқиш ва экспорт учун янги имкониятларни топишда ёрдам беришлари керак бўлади.
Ўзбекистон экспортининг 60 фоизи тўғри келадиган 20 та мамлакатда, шунингдек, яна бешта истиқболли давлатда «экспорт элчилари» фаолиятини ташкил этиш режалаштирилмоқда.
Уларни тегишли мамлакатга энг кўп экспорт қиладиган тадбиркорларнинг ўзлари танлашади.
«Экспорт элчилари» бошқа компанияларга савдо тармоқларига чиқиш, сертификатлаш ва маркетинг бўйича ёрдам беришади. Уларнинг сафар ва яшаш харажатлари қоплаб берилади.