Ўзбекистонда тадбиркорлик билан боғлиқ давлат хизматларининг 50 фоизи «сукут — розилик белгиси» тамойилига ўтказилади. Бу ҳақда президент Шавкат Мирзиёев 18 август куни Хоразм вилоятида тадбиркорлар билан ўтказилган очиқ мулоқотда маълум қилди.
Янги тартибга кўра, агар тадбиркорнинг аризаси белгиланган муддатда кўриб чиқилмаса, у автоматик равишда унинг фойдасига ҳал қилинган деб ҳисобланади.
Президент, шунингдек, лицензия беришни рад этишнинг ҳар бир ҳолатини бизнес омбудсман ўрганиб чиқишини маълум қилди. Асоссиз рад этганлик учун жавобгарликни кучайтириш режалаштирилмоқда.
Баъзи лицензия ва рухсатномалар бекор қилинади
Яқин орада 30 дан ортиқ фаолият тури бўйича лицензия ва рухсатномалар бекор қилинади.
Яна 35 та тур бўйича уларни бериш муддатлари 2−3 бараварга қисқартирилади, 10 турдаги рухсатномалар эса хабардор қилиш тартибига ўтказилади.
Бундан ташқари, ҳар қандай янги лицензия ёки рухсатнома жорий этилишидан олдин тегишли механизм дастлаб олти ой давомида учта ҳудудда тажриба-синов тариқасида ўтказилади.
Озиқ-овқат экспорти учун ягона сертификат
Озиқ-овқат маҳсулотлари экспортчилари учун ҳам рухсат бериш тартиб-омилларини соддалаштириш режалаштирилмоқда.
Алоҳида ветеринария, санитария ва фитосанитария рухсатномалари ўрнига ягона «Саломатлик сертификати» берилади.
Шавкат Мирзиёев тадбиркорларнинг ижро ҳужжатлари асосида уларнинг мол-мулкига хатлов қўйилиши бўйича кўплаб мурожаатларига алоҳида тўхталиб ўтди.
Президентнинг сўзларига кўра, ушбу муаммога алоҳида учрашув бағишланади ва унинг якунлари бўйича тизимли ечимлар белгилаб олинади.
Эслатиб ўтамиз, Ўзбекистонда жарималар миқдори ўртача икки бараварга қисқартирилади, биринчи марта содир этилган хавфсиз ҳуқуқбузарлик учун эса камчиликларни бартараф этишга 10 кун берилади, деб хабар қилди президент. 2027 йилдан бошлаб давлат билан низоларда «тадбиркорнинг ҳақлиги презумпцияси» жорий этилади.