Тошкентнинг Шаҳрисабз кўчасида автобуслар учун BRT (bus rapid transit) типидаги алоҳида ажратилган йўлакни ташкил этиш лойиҳасининг биринчи босқичи 1 сентябрга қадар якунланиши кутилмоқда. Бу ҳақда пойтахт Йўл ҳаракатини ташкил этиш маркази маълум қилди.
Ушбу участканинг узунлиги тахминан 1,2 км ни ташкил этади — Шаҳрисабз — Миробод — Шота Руставели кўчалари айланмасидан Амир Темур шоҳкўчаси кесишмасигача (Санъат музейи). Навбатдаги босқич Шаҳрисабз кўчасининг Амир Темур шоҳкўчаси билан кейинги кесишмасигача (Wyndham меҳмонхонаси) бўлган қолган қисмини қамраб олади, у ердан линия Юнусобод томон давом этиши керак.
Ишларнинг чўзилиш сабаби
Биринчи босқичдаги ишлар 24 июлда бошланган эди. Улар августнинг биринчи ҳафтасигача давом этиши кутилганди. ЙҲТЭМ ишларнинг чўзилганини қатнов қисми пойдеворининг тўлиқ қайта қурилаётгани билан изоҳлади.
ЙҲТЭМ видеосидан кадр.
«БРТ йўлагидан мунтазам равишда катта сиғимли ва оғир автобуслар ҳаракатланишини инобатга олиб, йўлнинг узоқ муддат хизмат қилишини таъминлашга алоҳида эътибор қаратилмоқда. Шу мақсадда йўл қисми 2 метрдан ортиқ чуқурликкача қазилиб, мавжуд асос қайта шакллантирилмоқда», — дейилади хабарда.
Пойдеворнинг янги конструкцияси йўл тўшамаси остида намлик йиғилмаслиги, тупроқнинг сурилиши ва чўкиши хавфи минимал бўлиши учун ҳисоблаб чиқилган. Йўл конструкцияси қатламлари орасига сув ўтказувчан геотекстиль материали ётқизилмоқда. Бу қатламларнинг белгиланган тузилиши ва қалинлигини сақлаб қолиш ҳамда пойдевор мустаҳкамлигини ошириш имконини беради.
Шаҳрисабз кўчаси BRT линияси билан шундай кўринишда бўлиши мумкин. Ҳокимиятнинг 2026 йил апрелидаги тақдимотидан слайд.
Биринчи участкада 6 та бекат платформасини жойлаштириш режалаштирилган. Бошқа автомобиллар кириб кетишининг олдини олиш учун йўлак бордюрлар билан жисмонан ажратиб қўйилади.
Бутун коридор узунлиги 16,3 км ни ташкил этади
2025 йилда Ўзбекистонда илк бор кўча маркази бўйлаб автобуслар учун ажратилган йўлак участкаси — Шота Руставели кўчасида ишга туширилган эди. Унинг узунлиги тахминан 7 км ни ташкил этади.
Янги Сергели — Шота Руставели — Шаҳрисабз — Амир Темур кўчалари бўйлаб BRT коридори (16,3 км). Ҳокимиятнинг 2026 йил апрелидаги тақдимотидан слайд.
Энди ушбу линия Шаҳрисабз ва Амир Темур кўчалари бўйлаб, қарама-қарши томондан эса Янги Сергели кўчаси бўйлаб узайтирилмоқда. Ушбу коридорнинг умумий узунлиги 16,3 км ни ташкил этади. Ҳокимият ушбу лойиҳани апрель ойида тақдим этган эди.