Ўзбекистонда бизнесга маъмурий босимни камайтириш режалаштирилмоқда. Бу ҳақда президент Шавкат Мирзиёев 18 август куни Хоразм вилоятида тадбиркорлар билан ўтказилган очиқ мулоқотда маълум қилди.
Давлат раҳбарининг сўзларига кўра, сўнгги уч йилда Ўзбекистонда солиқ юки 13,4 фоиздан 12 фоизгача камайди, ўн йил ичида эса яширин иқтисодиёт улуши 50 фоиздан 26 фоизгача қисқарди.
«Иқтисодиётни «соя»дан чиқариш текшириш билан эмас, тадбиркорга йўл кўрсатиб, тўғри ишлашга ўргатиш орқали бўлиши керак», — деди Шавкат Мирзиёев.
Президент 5000 тадбиркор фаолияти таҳлили шуни кўрсатганини маълум қилди: уларнинг ярмидан кўпи йилига 2−3 марта, яна 21 фоизи эса тўрт мартадан солиқ текширувига тортилган.
Бунда солиқ текширувларига ёнғин хавфсизлиги, қурилиш, санитария, карантин ва энергетика инспекциялари томонидан қайта текширувлар ҳам қўшилади.
«Бир нарсани тушуниш керак: хотиржамлик бўлмаган жойда эркинлик ҳам, ривожланиш ва янгиликка интилиш ҳам бўлмайди», — деди президент.
Кичик бизнесни текширишга мораторий
Шавкат Мирзиёев кичик бизнесни текширишга уч йиллик мораторий жорий этилишини эълон қилди. У одамлар соғлиғига ёки бошқа тадбиркорларнинг манфаатларига зарар етказиш билан боғлиқ бўлмаган текширувларга татбиқ этилади.
Шу тариқа, фуқаролар соғлиғи учун хавф мавжуд бўлган ёки бошқа бизнес вакилларининг манфаатларига дахл қиладиган ҳолатлардаги текширувлар сақланиб қолади.
Ўрта ва йирик бизнес учун ихтиёрий профилактик аудит механизмини жорий этиш режалаштирилмоқда.
Агар тадбиркор корхонада шундай аудитни мустақил равишда ўтказса, солиқ органлари унинг хулосасини тан олади.
Қоидабузарликлар аниқланган тақдирда, камчиликларни бартараф этган тадбиркор жаримага тортилмайди.
Бундан ташқари, корхонани бир йил давомида такроран текширишни фақат бизнес омбудсман рухсати билан амалга ошириш мумкин бўлади.
Эслатиб ўтамиз, Ўзбекистонда 2025 йил 1 июлдан 2028 йил 1 январгача кичик бизнес учун ҳар қандай қўшимча мажбуриятларга мораторий жорий этилган. Шунингдек, «биринчи имконият» тамойили жорий этилмоқда — тадбиркорлар иш фаолиятининг биринчи йилидаги биринчи қоидабузарлик учун жазоланмайди.