Bank of Georgia`га эгалик қилувчи Lion Finance Group Ўзбекистон банк бозорига маҳаллий етакчи банклардан бирини сотиб олиш орқали кириш имкониятини кўриб чиқмоқда. Бу ҳақда Bloomberg`га Lion Finance Group бош директори Арчил Гачечиладзе маълум қилди.
Унинг сўзларига кўра, компания Bank of Georgia`нинг рақамли моделини янги бозорларга олиб чиқишни режалаштирмоқда ва биринчи навбатда йирик банкларга эътибор қаратмоқда.
«Биз топ учлик ёки бешликка кирувчи ўйинчиларга эътибор қаратмоқдамиз. Бу қийматни очишнинг калити — биз ушбу моделни қўллай оладиган янги бозорларни топиш», — деди Гачечиладзе.
Шу билан бирга, Lion Finance Group учун бозорнинг биринчи учлигидаги банклар афзал вариант ҳисобланади.
«Биринчи учлик афзалроқ. Биз кичик банкларга кирмаяпмиз», — деди гуруҳ раҳбари.
Ўзбекистонда айнан қайси банклар харид қилиш учун эҳтимолий нишон сифатида кўриб чиқилаётгани мақолада аниқлаштирилмаган. Шунингдек, аниқ музокаралар ёки таклифлар мавжудлиги ҳақида ҳам маълум қилинмаган.
Ўзбекистон Марказий банкининг Gazeta ўрганган маълумотларига кўра, Ўзбекистонда активлари бўйича энг йирик бешта давлат банки қаторига Ўзбекистон Миллий банки, «Агробанк», «Ўзсаноатқурилишбанк» (SQB), «Асакабанк» ва Халқ банки киради.
Янгиланган «Ўзбекистон — 2030» стратегиясига кўра, 2027 йилда давлат банклари сони 9 тадан 7 тага, 2028 йилда 6 тага, 2029 йилда 5 тага, 2030 йилга келиб эса 4 тагача қисқариши керак. Шу тариқа, давлат тўрт йил ичида бешта банкни хусусийлаштиришни режалаштирмоқда.
Ҳукуматнинг бюджет стратегияси 2026 йилда ёки ундан кейин SQB, «Асакабанк», «Алоқабанк» ва «Туронбанк»ни хусусийлаштиришни назарда тутади.
Fitch Ratings маълумотларига кўра, «Ўзсаноатқурилишбанк» сотувга энг тайёр банк ҳисобланади ва бошқа давлат банклари учун трансформация намунаси бўлиши мумкин. «Асакабанк» ва «Алоқабанк»ни сотиш жараёни 2030 йилга яқинроқ муддатга сурилиши мумкин.
Ўзбекистонда активлари ҳажми бўйича энг йирик бешта хусусий банк қаторига «Капиталбанк», «Ипотека-банк», «Ҳамкорбанк», «Ипак йўли банк» ва Orient Finans Bank киради.
Ameriabank’ни сотиб олиш тажрибаси
Lion Finance Group 2024 йилда Арманистоннинг Ameriabank банкини 303,6 млн долларга сотиб олиши унинг кейинги минтақавий экспансияси учун намуна бўлди.
Ҳозирда Ameriabank гуруҳ активларининг қарийб учдан бир қисмини таъминлайди. Банк Арманистон кредит бозоридаги улушини 23 фоиздан 30 фоизгача, депозитлар бозоридаги улушини эса 20 фоиздан 30 фоизгача оширишни режалаштирмоқда.
Lion Finance Group FTSE 100 индекси таркибига киради, унинг бозор капитализацияси қарийб 5,8 млрд фунт стерлинг ёки 7,9 млрд долларни ташкил этади. Сўнгги беш йилда гуруҳ акциялари тахминан 740 фоизга ўсди.
Компания ўсишининг асосий омилларидан бири рақамли банкингнинг ривожланиши бўлди. Грузия аҳолиси қарийб 4 млн кишини ташкил этишига қарамай, Bank of Georgia иловасининг кунлик фаол фойдаланувчилари сони 1 млн нафарга яқин.
Lion Finance Group`нинг ўртача ўз капитали рентабеллиги қарийб 27 фоизни ташкил этади, кредит портфели эса иккинчи чоракда доимий валютада йиллик ҳисобда 23 фоизга ўсди.
Гачечиладзе гуруҳнинг кейинги ўсиши, жумладан, Грузиядан ташқаридаги харидлар билан боғлиқ бўлишини билдирди. Lion Finance Group кўриб чиқаётган бозорлар орасида у Марказий Осиёда Ўзбекистон ва Қозоғистонни, шунингдек, Болтиқбўйи ва Болқон мамлакатларини алоҳида қайд этди.