Таиланд ҳукумати 93 та давлат, жумладан, Ўзбекистон фуқаролари учун амал қилган 60 кунлик визасиз бўлиш тартибини расман бекор қилди. Бу ҳақда Bangkok Post нашри Таиланд Қироллик газетасига (Royal Gazette) таяниб хабар бермоқда.
Тегишли қарор Таиланд бош вазири ва ички ишлар вазири Анутин Чарнвиракул томонидан 31 август куни имзоланган. Янги тартиб эълон қилинганидан 15 кун ўтиб — 2026 йил 15 сентябрдан кучга киради.
Май ойида Таиланд Вазирлар маҳкамаси чет эл фуқаролари томонидан мазкур режим суиистеъмол қилинаётгани бўйича ортиб бораётган хавотирлар фонида визасиз бўлиш муддатини қисқартиришни маъқуллаганди. Ҳукуматнинг қайд этишича, хорижликлар сайёҳ сифатида кириб келиб, ноқонуний корхоналар очган, тегишли рухсатномасиз ишлаган ёки трансмиллий жиноий схемаларда иштирок этган.
Янги қоидаларга кўра, 60 та давлат фуқаролари Таиландга 30 кунгача бўлган муддатга визасиз киришлари мумкин бўлади. Улар орасида Австралия, Буюк Британия, Европа Иттифоқи мамлакатлари, Грузия, БАА, АҚШ, Туркия, Украина ва Япония бор. Марказий Осиё давлатларидан ушбу рўйхатга фақат Қирғизистон киритилди.
Бундан ташқари, мазкур 60 та давлат фуқароларига Таиландга қуруқликдаги назорат-ўтказиш пунктлари орқали бир календарь йилида кўпи билан икки марта киришга рухсат этилади. Бруней, Индонезия, Малайзия ва Сингапур фуқаролари бундан мустасно.
Озарбайжон, Беларусь ва Сербия фуқаролари эса визани етиб боргач (Visa on Arrival) олишлари мумкин бўлади.
Ўзбекистон юқорида қайд этилган рўйхатларнинг бирортасига ҳам киритилмаган. Uzbekistan Airways маълумотларига кўра, Ўзбекистон фуқаролари 15 сентябрдан бошлаб Таиландга сайёҳлик мақсадида кириш учун визани олдиндан расмийлаштиришлари шарт.
Виза олиш учун аризани сафар олдидан, жумладан, расмий thaievisa.go.th портали орқали топшириш мумкин. Виза йиғими АҚШ долларида Таиланднинг энг яқин консуллигида тўланади.
Авиакомпаниянинг аниқлик киритишича, Тошкентдан 14 сентябрь куни учиб кетиб, Бангкокка 15 сентябрда етиб борадиган HY531 рейси йўловчиларига нисбатан ҳам янги виза талаблари амал қилади.
Узоқ йиллар давомида Таиланд 56 та давлат фуқаролари учун 30 кунгача бўлган муддатга визасиз тартибни тақдим этиб келган. 2024 йилнинг июль ойида бу муддат 60 кунгача узайтирилган, давлатлар рўйхати эса 93 тагача кенгайтирилиб, унга Ўзбекистон ҳам киритилганди. Бу чора пандемиядан сўнг туризм соҳасини қўллаб-қувватлаш ва иқтисодиётни рағбатлантириш мақсадида қабул қилинганди.