Ўзбекистонда нақд валютани божхона декларациясини тўлдирмасдан олиб чиқиш чегарасини 10 минг долларга тенг миқдорда белгилаш режалаштирилмоқда. Бу президентнинг 27 августдаги божхона органлари фаолиятини такомиллаштириш тўғрисидаги фармонида назарда тутилган.
Ҳужжат билан «Янги Ўзбекистон божхонаси — 2030» стратегияси тасдиқланди. Чора-тадбирлар режасига кўра, фақат ушбу суммадан ошгандагина декларация талаб қилинадиган тизимни яратиш таклиф этилмоқда.
Божхона қўмитасига Иқтисодиёт ва молия вазирлиги, Марказий банк ҳамда Адлия вазирлиги билан биргаликда қонун лойиҳасини тайёрлаш ва 2027 йил декабрга қадар Вазирлар Маҳкамасига киритиш топширилди.
2023 йил сентябрь ойидан бошлаб 100 млн сўмгача (бунгача 70 млн сўм эди) бўлган миллий ёки хорижий валютадаги нақд пулларни йўловчи божхона декларациясини тўлдирмасдан олиб чиқиш мумкин. 2 сентябрдаги расмий курс бўйича бу тахминан 8453 долларни ташкил этади. 100 млн сўмдан ортиқ сумма декларацияланиши шарт, бунда декларацияда фақат ортиқча қисми эмас, балки олиб чиқилаётган барча маблағлар кўрсатилиши керак.
Ҳозирда 100 млн сўмдан ортиқ маблағни олиб чиқишга фақат алоҳида ҳолларда йўл қўйилади. Резидентлар учун бундай истисно, хусусан, хорижий хизмат сафарларига юборилаётган ҳукумат делегациялари аъзолари учун назарда тутилган. Норезидентлар илгари олиб кирилган ва декларация қилинган валюта қолдиғини олиб чиқишлари мумкин. Халқаро мусобақалар, танловлар ва олимпиадалар иштирокчилари ҳамда совриндорлари учун алоҳида тартиб амал қилади.
Валюта бозори либераллаштирилганидан ва эгилувчан курс шаклланишига ўтилганидан сўнг, ислоҳотларнинг кейинги босқичи капитал ҳаракати операциялари ҳисобини янада кенгроқ очиш бўлади, деган эди аввалроқ Марказий банк раҳбари Тимур Ишметов. Унинг сўзларига кўра, ҳимоя механизмларини сақлаб қолган ҳолда инвесторларга кўпроқ эркинлик бериш олинмоқда.
