Ўзбекистонда 2026 йил бошидан буён «оқ» такси бозори қандай ўзгарди?

Солиқ қўмитаси 2026 йилнинг январь-август ойларида такси бозори фаолияти бўйича маълумотларни тақдим этди.

Ҳозирда солиқ органларининг ахборот тизимларига 242 та такси агрегатори интеграция қилинган. Таққослаш учун, 2024 йил ёзида уларнинг сони 142 та, ўша йил якунида 155 та, 2025 йил охирида эса 224 тани ташкил этган.

Саккиз ой давомида агрегаторлар орқали 329,04 млн марта йўловчи ташилган. Такси хизматларидан тушган умумий айланма 7,2 трлн сўмдан ошган.

Шундан 4,5 трлн сўм ёки 63,1 фоизи нақд пулдаги тўловлар ҳиссасига тўғри келган. Яна 2,6 трлн сўм ёки 36,9 фоизи нақд пулсиз ҳисоб-китоблар орқали амалга оширилган.

Нақд пулсиз тўловлар улуши сезиларли даражада ошган. Таққослаш учун, 2024 йилда бу кўрсаткич 23,7 фоизни, 2025 йил якунида эса 27,8 фоизни ташкил этган.

Бир марта таксида юришнинг ўртача нархи 21 785,5 сўмни ташкил қилди. 2024 йил якунида бу кўрсаткич 18 456 сўм, 2025 йилда эса 20 минг сўмдан сал кўпроқ бўлган.

Ҳайдовчилар ва уларнинг даромади

Агрегаторлар орқали 481,1 минг нафар ўзини ўзи банд қилган ҳайдовчи йўловчи ташиш билан шуғулланмоқда. Бундан ташқари, Солиқ қўмитаси маълумотига кўра, тизимда 593 та юридик шахс рўйхатдан ўтган. Таққослаш учун, йил бошида ўзини ўзи банд қилган ҳайдовчилар сони қарийб 574,6 минг нафарни ташкил этган.

Агрегаторлар орқали 4107 нафар аёл ҳайдовчи ҳам фаолият юритмоқда. Йил бошида уларнинг сони 4726 нафар бўлган.

Даромад миқдори бўйича ҳайдовчилар қуйидагича тақсимланган:

• 100 млн сўмдан ортиқ — 7,9 мингдан зиёд ҳайдовчи;

• 50 млн сўмдан 100 млн сўмгача — 31,5 минг;

• 10 млн сўмдан 50 млн сўмгача — 124,4 минг;

• 5 млн сўмдан 10 млн сўмгача — 59,9 минг;

• 1 млн сўмдан 5 млн сўмгача — 123,6 минг;

• 1 млн сўмгача — 133,7 минг ҳайдовчи.

Солиқ қўмитаси аввалроқ рўйхатдан ўтган ўзини ўзи банд қилганларнинг барчаси ҳам мунтазам равишда йўловчи ташиш билан шуғулланмаслигини қайд этган. Айрим ҳайдовчилар бир ойда бир неча марта ёки ҳатто ҳафтасига бир марта ишга чиқиши мумкин.

Cobalt энг оммабоп автомобиль бўлиб қолди

Такси сифатида фойдаланилаётган автомобиллар орасида Chevrolet Cobalt ҳамон энг оммабоп модель бўлиб қолмоқда — унинг улуши 27 фоизни ташкил этган. Йил бошида бу кўрсаткич 23,7 фоиз эди. Кейинги ўринларда Nexia — 19,3 фоиз ва Lacetti — 16,1 фоиз билан қайд этилган.

Электромобиллар улуши ҳам ошган: 2025 йил якунидаги 1,9 фоиздан 2,5 фоизга етган.

Такси сифатида ишлатилаётган автомобилларнинг ёш таркиби ҳам ўзгарган. Ҳозирда:

• 1−3 йиллик автомобиллар — 16,3 фоиз;

• 3−5 йиллик — 37,1 фоиз;

• 5−10 йиллик — 17,3 фоиз;

• 10 йилдан ошган автомобиллар — 29,2 фоизни ташкил этмоқда.

Тошкент такси бозорининг қарийб ярмини эгаллаб турибди

Агрегаторлар орқали амалга оширилган сафарларнинг асосий қисми ҳамон пойтахт ҳиссасига тўғри келмоқда. Январь-август ойларида жами сафарларнинг 45,3 фоизи Тошкент шаҳрида амалга оширилган. 2025 йил якунида бу кўрсаткич 44,6 фоизни ташкил этган.

Кейинги ўринларда:

• Фарғона вилояти — 8,46 фоиз;

• Самарқанд вилояти — 8,04 фоиз;

• Бухоро вилояти — 6 фоиз;

• Андижон вилояти — 5,87 фоиз;

• Тошкент вилояти — 5,2 фоиз;

• Хоразм вилояти — 4,86 фоиз;

• Қорақалпоғистон — 4,37 фоиз.

Солиқлар

2026 йилнинг январь-август ойларида такси агрегаторлари 149,2 млрд сўм солиқ тўлаган, шундан 46,8 млрд сўми ҚҚС ҳиссасига тўғри келган. Таққослаш учун, 2025 йил давомида агрегаторлар 128,2 млрд сўм солиқ тўлаган бўлиб, унинг 63,6 млрд сўмини ҚҚС ташкил этган.