Нувакот ҳудудида тахминан 60 ёшли аёл уй вайроналари остидан тирик топилди. У қутқарилгандан сўнг вертолётда шифохонага етказилган.
Деярли шу пайтда Непал ҳарбийлари ва Жанубий Корея қутқарувчиларидан иборат гуруҳ Upper Trishuli ГЭСи туннелида Хитой фуқаросини топди. Қутқарувчилар туннел ичига қарийб 225 метр кириб борган. Жабрланувчига биринчи ёрдам кўрсатилиб, у ҳам вертолётда эвакуация қилинган.
Бундан бир кун аввал Trishuli ГЭСи туннелидан яна икки непаллик ишчи қутқарилган. Шу тариқа икки кун ичида тўрт киши тирик топилди.
Расмийлар бошқа туннелларда ҳам тирик қолганлар бўлиши мумкинлигини истисно қилмаяпти. 12 та гидроэнергетика объектида ишлаган қарийб 900 киши бедарак йўқолган, уларнинг тахминан 500 нафари ер остида қолган бўлиши мумкин.
Эслатиб ўтамиз, 26 август куни Непал ва қўшни Тибетда юз берган сув тошқинига музлик кўчиши сабаб бўлгани тахмин қилинмоқда. Непалда 1 344 киши ҳалок бўлгани тасдиқланган, қарийб 4 900 киши бедарак йўқолган. Тибетда эса 31 киши ҳалок бўлган ва 531 киши бедарак йўқолгани хабар қилинган.