7 сентябрдан Паркент-Тошкент-Паркент йўналишида шаҳарлараро электропоезд йўловчиларга хизмат кўрсата бошлади. Бу ҳақда Транспорт вазирлиги хабар қилди.
Электропоезд қатнови Ўзбекистоннинг транспорт-логистика тизимини ривожлантиришга қаратилган чора-тадбирлар доирасида амалга оширилган «Байтқўрғон-Паркент» темир йўл линиясининг қурилиши якунлангани ортидан йўлга қўйилди.
Маълумотларга кўра, ушбу темир йўл линиясининг қурилиши 2025 йил январь ойида бошланган.
Лойиҳа доирасида узунлиги 24 километр бўлган электрлаштирилган темир йўл, 3 та темир-бетон кўприк, 1 та автомобиль йўл ўтказгичи, 76 та сув ўтказиш иншооти ҳамда 16 та автомобиль ва темир йўл кесишмаси барпо этилди. Шунингдек, 50 ўринга мўлжалланган «Паркент» темир йўл бекати қурилди.
Янги электропоездда 586 та ўрин мавжуд бўлиб, жами 1154 нафаргача йўловчини ташиш имконияти бор. Йўловчилар учун чипта нархи катталарга 10 минг сўмгача, 10 ёшгача бўлган болаларга эса 6,5 минг сўм этиб белгиланган. Паркентгача бўлган йўл тахминан 50 дақиқа вақт олади.
Янги темир йўл қатнови Паркент туманига боришни осонлаштириши билан бирга, ҳудуднинг туристик салоҳиятини оширишга ҳам хизмат қилиши кутилмоқда.
