Ўзбекистонда 46 мингдан ортиқ квартира кўп қаватли уйларнинг биринчи қаватларида жойлашган бўлиб, улардан нотурар жой фондига ўтказмасдан савдо ва хизмат кўрсатиш мақсадларида фойдаланиш иш ўринлари яратиши мумкин. Бундай ҳисоб-китобларни қурилиш ва уй-жой коммунал хўжалиги вазири Шерзод Ҳидоятов 9 сентябрь куни президент Шавкат Мирзиёев раислигида ўтказилган йиғилишдан сўнг келтирди.
«Бугунги кунда ҳисобласак, 46 мингдан ортиқ квартира биринчи қаватларда жойлашган. 200 мингдан ортиқ киши иш билан таъминланади ва бу аҳоли даромадларига сезиларли таъсир кўрсатади», — деди вазир «Ўзбекистон 24» телеканалига берган интервьюсида.
Унинг сўзларига кўра, президент кўп қаватли уйларнинг биринчи қаватларидаги квартиралардан хонани нотурар жой фондига ўтказмасдан кичик савдо ва хизмат кўрсатиш объектлари сифатида фойдаланиш имконини берувчи янги тартиб ишлаб чиқишни топширди.
«Яъни, хонани нотурар жойга ўтказмасдан сартарошхона, ателье, гўзаллик салони ва бошқа кичик хизмат кўрсатиш объектларини очиш мумкин бўлади. Бунинг учун алоҳида кириш эшигини очиш ва ички хоналарни мослаштиришнинг ўзи кифоя қилади», — деди Шерзод Ҳидоятов.
Йиғилишда қайд этилишича, ҳозирда квартирани нотурар жой фондига ўтказиш учун бир қатор тартиб-таомиллардан ўтиш ва рухсатномалар олиш талаб этилади. Биринчи қаватлардаги квартираларда тадбиркорлик фаолиятини хонанинг мақомини ўзгартирмасдан амалга оширишга рухсат берувчи соддароқ тартибга ўтиш таклиф этилмоқда.
Фаолиятни хабардор қилиш тартибида йўлга қўйиш режалаштирилмоқда. Масъул идораларга бир ой ичида бундай квартираларда амалга ошириш мумкин бўлган фаолият турлари рўйхатини ҳамда хавфсизлик талабларини белгилаш топширилди.
Вазирнинг сўзларига кўра, ҳужжат лойиҳаси Урбанизация қўмитаси, санитария ва бошқа тегишли идоралар билан биргаликда тайёрланиб, бир ой ичида кўриб чиқиш учун киритилади.
Эслатиб ўтамиз, Ўзбекистонда кўп қаватли уйлар атрофидаги бўш ҳудудларни аниқлаш ва ўзбошимчалик билан эгаллаб олинган ер участкаларини тартибга солиш режалаштирилган. Бу ҳудудларда болалар ва спорт майдончалари, шунингдек, яшил зоналар ташкил этиш кўзда тутилмоқда. Хусусий мактаб ва боғчалар қуриш учун ер участкалари эса 1 млн сўм бошланғич нархда аукционга чиқарилиши мумкин.