Ўзбекистон президенти Шавкат Мирзиёев 11 сентябрь куни Тошкент шаҳрини ривожлантириш, инвестициялар, бандлик ва маҳаллалардаги инфратузилма бўйича йиғилиш ўтказди.
Давлат раҳбарининг сўзларига кўра, пойтахт туманлари ўз салоҳиятидан келиб чиқиб, аниқ иқтисодий йўналишларга ихтисослашиши керак.
Сергели, Янгиҳаёт ва Бектемир туманларида Тошкентга келувчи юкларни саралайдиган, қадоқлайдиган, тақсимлайдиган ва етказиб берадиган йирик логистика комплексларини ташкил этиш таклиф қилинмоқда.
Шайхонтоҳур, Мирзо Улуғбек, Миробод, Юнусобод ва Якасарой туманларини бизнес ва молия марказлари сифатида ривожлантириш режалаштирилмоқда. Ҳокимият бу ерда ҳажми 2 млрд долларлик капитал бозорини шакллантиришни ва 20−25 мингта юқори даромадли иш ўринларини яратишни мўлжалламоқда.
Олмазор, Чилонзор ва Учтепа туманларида таълим, тиббиёт, савдо ва хизмат кўрсатиш соҳаларига камида 1 млрд доллар жалб этиш режалаштирилмоқда. Бу 15−20 мингта иш ўрни яратиши керак.
Инвесторлар билан ишлаш масаласи алоҳида муҳокама қилинди. 2026 йилда Тошкентнинг 12 та туманига 9 млрд доллар инвестиция жалб этиш режалаштирилган. Президент бир қатор туманларнинг инвестиция жалб қилиш режаларидан ортда қолаётганини танқид қилди ва инвесторлар билан ишлашнинг янги тартибини эълон қилди.
Бектемир туманида режадаги 450 млн доллардан 293 млн доллар, Янгиҳаётда — режалаштирилган 500 млн доллардан 310 млн доллар, Учтепада — режадаги 550 млн доллардан 335 млн доллар, Юнусободда — режадаги 1 млрд доллардан 650 млн доллар жалб этилган.
«Ушбу туманлар ҳокимлари қолган қисқа вақт ичида ўз ваъдаларини қандай бажаришлари ҳақидаги саволга жавоб беришлари керак. Инвестициялар бўйича янги тизим жорий этилади. Бош вазир Арипов, ислоҳотлар штаби — Умурзақов, Азимов, Бутунбоев, Қудбиев, шунингдек, туманларга бириктирилган республика даражасидаги раҳбарлар ҳокимлар билан биргаликда ҳар шанба куни туманлардан бирига чиқади, эрталабдан кечгача инвесторларни қабул қилади ва уларнинг масалаларини ҳал қилади», — деди президент.
Инвесторларнинг турли идорама-идора сарсон бўлиб юришига йўл қўймаслик учун уларнинг масалаларини бевосита туманларнинг ўзида ҳал қилиш таклиф этилди. Республика ва шаҳар ҳокимияти вакиллари ҳар ҳафта жойларда тадбиркорлар ва инвесторлар билан учрашади.
Агар масала юқорироқ даражада ҳал этишни талаб қилса, таклифлар ўша куннинг ўзида Президент администрациясига юборилиши керак. Бундай «алоҳида назорат остидаги» тартиб йил охиригача амал қилади.
«Ушбу туман бўйича масалалар президент даражасига ҳам олиб чиқилади. Душанба кунигача бирорта ҳам ҳал этилмаган муаммо қолмаслиги керак. 1 январгача ушбу тизим бўйича ишлаймиз», — деди Шавкат Мирзиёев.
Шавкат Мирзиёев, шунингдек, 2027 йилда Тошкентга 10 млрд доллар инвестиция жалб этиш ҳамда 150−200 мингта доимий юқори даромадли иш ўринларини яратиш бўйича режа тайёрлашни топширди.