Bir guruh vengriyalik diplomatlarga ikki hafta ichida Rossiyani tark etish talabi qo‘yildi. Bu haqda Rossiya Tashqi ishlar vazirligiga tayanib “RIA Novosti” xabar berdi.
Bayonotda aytilishicha, javob choralari doirasida Vengriyaning Moskvadagi elchixonasi, shuningdek, Sankt Peterburg va Qozondagi bosh konsulliklarining bir guruh xodimlari ikki hafta ichida Rossiya hududidan chiqib ketishi shart.
Vazirlik bu qarorni respublikaning muvaqqat ishlar vakili Gabor Gergitsga yetkazdi. Shuningdek, Vengriya rasmiylarining “asossiz va do‘stona bo‘lmagan” harakatlari yuzasidan unga qat’iy e’tiroz bildirildi.
Mojaroning kelib chiqishi
Gap sentyabr boshida Budapeshtning Rossiya diplomatik vakolatxonasining o‘n nafar xodimini mamlakatdan chiqarib yuborish to‘g‘risidagi qarori haqida ketmoqda. Vengriya tashqi ishlar vaziri Anita Orban ularni Vena konvensiyasiga zid bo‘lgan ishlar bilan shug‘ullanganlikda ayblagandi.
Hokimiyat almashgandan so‘ng, Budapesht Rossiya bilan pragmatik munosabatlarni saqlab qolish niyatida ekanini e’lon qildi. Xususan, yangi bosh vazir Peter Madyar energetika resurslari bo‘yicha hamkorlik muhimligini ta’kidlamoqda. Biroq uning Yevropani qo‘llovchi siyosati Rossiyaga qarshi sanksiyalarga faol qarshi chiqqan va Moskva bilan yaqin iqtisodiy aloqada bo‘lgan Viktor Orbanning siyosatidan farq qiladi.
Vengriya Tashqi ishlar vazirligi Rossiyani mamlakat uchun muhim davlat deb atadi va Ukrainaga qurol-yarog‘ yetkazib berish niyati yo‘qligini tasdiqladi. Shu bilan birga, mamlakat mudofaa vaziri Romulus Rusin-Sendi Vengriyaning strategik manfaatlari G‘arb bilan to‘liq mos kelishini va mamlakat Moskva uchun “eshiklarni yopayotganini” aytdi.