Shavkat Mirziyoyev Samarqandda bo‘lib o‘tayotgan Osiyo konstitutsiyaviy sudlari va ekvivalent institutlari assotsiatsiyasining VII kongressi ishtirokchilariga murojaat yo‘lladi.
Davlat rahbari O‘zbekiston mazkur assotsiatsiyaga raisligi davomida Osiyoda huquqiy muloqotni yangi bosqichga ko‘tarish, amaliy hamkorlik muhitini yanada kengaytirish, yangi tashabbus va g‘oyalarni ishlab chiqish, barcha a’zo davlatlarga manfaat keltiradigan ta’sirchan mexanizmlarni joriy etishga harakat qilinayotganini qayd etdi.
Ushbu nufuzli xalqaro anjumanni tashkil etishga munosib hissa qo‘shgan barcha hamkorlarga, mintaqaviy tashkilotlar vakillariga hamda a’zo davlatlar delegatsiyalariga minnatdorlik bildirdi.
Foto: Konstitutsiyaviy sud
Ushbu anjuman 1–2-oktyabr kunlari Samarqand shahrida bo‘lib o‘tmoqda. Bu galgi kongress “Raqamlashtirish va sun’iy intellekt sharoitida konstitutsiyaviy odil sudlov” mavzusiga bag‘ishlanadi. Anjumanda dunyoning 20 dan ortiq davlatdan konstitutsiyaviy va oliy sudlar rahbarlari, xalqaro tashkilotlar vakillari hamda yetakchi huquqshunos olimlar qatnashadi.