SpaceX бош директори Илон Маск, Anduril асосчиси Палмер Лаки ва АҚШ Вакиллар палатасининг собиқ спикери Ньют Гингрич Пентагоннинг келажакдаги уруш усулларини ўрганишга бағишланган янги «Меридиан» лойиҳасига бошчилик қилади. Бу ҳақда АҚШ мудофаа вазири Пит Ҳегсетнинг баёнотига таяниб, Axios ва Fox News хабар бермоқда.
Бу Маск учун Трамп билан юз берган можаро ва май ойи охирида Ҳукумат самарадорлиги департаментидан (DOGE) кетганидан кейин АҚШ президенти Дональд Трамп маъмуриятидаги илк расмий лавозим ҳисобланади.
«Биз рақибларимизда йўқ бўлган ноёб американча устунлик манбасидан фойдаланмоқдамиз: булар — бизнинг новаторларимиз, юқори бўғин раҳбарларимиз ва технология соҳасидаги мутахассисларимиз бўлиб, улар кенг кўламда фикрлашга ва қатъий ҳаракат қилишга қодир, келажакдаги ихтилофлар учун ностандарт ечимлар топа оладиган одамлардир», — дея баёнот берди Ҳегсет.
Пентагон раҳбарининг таъкидлашича, «Меридиан» лойиҳаси янги ҳарбий стратегияларни ишлаб чиқиш учун мўлжалланмаган. Бунинг ўрнига гуруҳ АҚШ «эгаллаши керак бўлган соҳалар ва эга бўлиши шарт бўлган имкониятларни» аниқлашга, шунингдек, америкалик ҳарбийларнинг келажак авлодларига керак бўлиши мумкин бўлган қурол-яроғ ва тизимларни «қидириш, ишлаб чиқиш ва жорий этиш»га эътибор қаратади.
Ҳегсет тадқиқот натижалари 120 кундан кейин тақдим этилиши кераклигини таъкидлади. Уларнинг бир қисми оммага очиқланади, шу билан бирга, алоҳида махфий ҳисобот ҳам тайёрланади.
Илон Маск 2024 йилги сайловолди кампаниясида Дональд Трампни очиқ қўллаб-қувватлаб, унда, жумладан, молиявий жиҳатдан ҳам иштирок этган эди. Республикачи иккинчи муддатга сайлангач, тадбиркор президент маъмуриятида DOGE`га раҳбарлик қилган.
