Абдулла Орипов,
Ўзбекистон халқ шоири.
У қўшиқ куйлади ёр шаънига маст,
Шухчан шеърлар айтди севги номидан.
Ҳаммани кулдирди, қиз бўлса шу пайт,
Бепарво, жилмайиб ўтди ёнидан.
У қўшиқ куйлади ёр шаънига маст,
Йиғлаб нола чекди севги номидан.
Ҳаммани йиғлатди, қиз бўлса яна
Бепарво жилмайиб ўтди ёнидан.
У қўшиқ куйлади ёр шаънига маст,
На кулди, на қатра тўкди ёшини.
У куйлади мағрур, қиз бўлса шу дам,
Ҳузурига келди эгиб бошини…